Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 297 Hüküm no: 186 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duacızade Abdullah Efendi’nin varislerinin mirastan olan eşya davalarında sulh oldukları Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i şerîf-i enverden me’zûnen irsâl olunan Mevlânâ Abdullah Efendi b. İbrahim Efendi mahmiye-i İstanbul’da Hoca Üveys mahallesinde sâkin iken bundan akdem vefât eden Du‘âcızâde Abdullah Efendi b. Mustafa b. Himmet’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Râbia Hatun bt. Abdülbaki’ye ve sagīre kızı Âişe’ye ve li-ebeveyn ammi oğlu İsmail b. Osman’a münhasıra ve tashîh meselesi sekiz sehmden olmağla sihâm-ı mezbûrenin bir sehmi zevcesi mezbûre Râbia’ya ve dört sehmi kızı mezbûre Âişe’ye ve bâkī üç sehmi mezbûr İsmail’e isâbeti tahakkukundan sonra sagīre-i mezbûre tesviye-i umûruna vasiyy-i muhtârı Şa‘bân Çelebi b. Mehmed vesâyeten ve mezbûr İsmail asâleten meclis-i ma‘kūd-ı mezbûrda bâ‘isetü’l-kitâb zâtı ta‘rîf-i şer‘î ile mu‘arrefe olan mezbûre Râbia Hatun mahzarında ikrâr ve takrîr-i kelâm edip işbu bir orta keçesini ve bir yan keçesi ve üç minder ve dört yastık ve bir döşek ve üç yorgan ve bir sincab kürk ve bir sîm kuşak ve bir yeşil taşlı altın sagīr yüzük ve iki sagīr sîm kuşağı müteveffâ-yı mezbûrun terekesinden olmağla defter-i kassâma idhâl murâd eylediğimizde mezbûre Râbia mâni‘a olur deyü da‘vâ eylediğimizde mezbûre Râbia’dan eşyâ-i muharrere-i mezbûre müstakillen benim mülk ve hakkım olup zevcim mezbûr Abdullah Efendi’nin alâka ve medhali yokdur deyicek husûs-ı mezbûra bizim beyyinemiz olmayıp mezbûre Râbia yemîni ile tasdîk olunur makūlesinden olmağın yemîn etmek sadedinde iken sulh sagīre-i mezbûre hakkında nef‘-i mahz olup bin akçe üzerine fedâen li’l-yemîn mezbûre Râbia ile bizi sulh ettiklerinde biz dahi sulh-ı mezbûru kabûl ve bedel-i sulh olan meblağ-ı mezbûru tashîh-i mezbûr üzere bi-kadri’l-hısâs yedinden alıp kabz eyledik ba‘de’l-yevm husûs-ı mezbûra müte‘allık mezbûre Râbia ile vechen mine’l-vücûh da‘vâ ve husûmetimiz yokdur dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Nasuh Beşe b. Yusuf ve Muhzır Mehmed Çelebi b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 25 min-Safer sene 1110 Şuhûdü’l-hâl: Mustafa Efendi b. Veliyüddin el-İmâm, Mehmed Çelebi b. Receb, el-Hâc Halil b. İsa, Abdülbaki Efendi b. Yusuf, Solak Mehmed Ağa b. Mustafa