Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 300 Hüküm no: 189 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Serkâtib Ahmed Ağa’nın vasisi olan Mustafa Ağa’nın, tay ve eyer alacağı iddiasıyla Çukacı Mustafa’ya açtığı davada haksız bulunduğu Dergâh-ı âlî kapıcıbaşılarından olup Havâss-ı aliyye kazâsına tâbi‘ Umurca nâm karyede vâki‘ çiftliğinde sâkin iken medyûnen vefât eden merhûm Ser-kâtib Ahmed Ağa b. Mustafa Efendi b. Bekir’in tesviye-i umûruna taraf-ı şer‘den vasî ve kayyım nasb ü ta‘yîn olunan Mustafa Ağa b. el-merhûm Haydar Paşa meclis-i şer‘-i şerîfde işbu bâ‘isü’l-kitâb Çukacı el-Hâc Mustafa b. el-Hâc Mehmed mahzarında üzerine bi’l-vesâye da‘vâ ve takrîr-i kelâm edip müteveffâ-yı merkūm hayâtında târîh-i kitâbdan dört sene mukaddem elli guruş kıymetli bir re’s demirkırı tayını ve on guruş kıymetli bir müsta‘mel sırmalı kırmızı kadife eyerini mezbûr el-Hâc Mustafa’ya bi-tarîkı’l-emâne vaz‘ ve teslîm ol dahi yedinden ahz u kabz edip kable’r-red mezbûr Ahmed Ağa vefât edip ve mârrü’z-zikr tay ve eyer hâlâ mezbûr el-Hâc Mustafa yedinde a‘yânı mevcûde olmağla vesâyetim hasebiyle taleb ederim suâl olunsun dedikde gıbbe’s-suâl mezbûr el-Hâc Mustafa cevâbında müteveffâ-yı mezbûr hayâtında târîh-i mezkûrda zikr olunan demirkırı tayını ve kadife eyerini safka-i vâhide ile hîbe-i sahîha-i tâmme ile bana hîbe ve temlîk ve teslîm ve ben dahi meclis-i hîbede ittihâb ve kabz u kabûl etmekle mârrü’z-zikr tay ve eyer mülk-i mevhûbum olmuşdur deyü def‘le mukābele edicek gıbbe’l-istintâk ve’l-inkâr mezbûr el-Hâc Mustafa’dan def‘-i meşrûhuna beyyine taleb olundukda merhûm-ı mezbûrun etbâ‘ından olup mahmiye-i İstanbul’da Dâye Hatun mahallesinde sâkin Hüseyin Çelebi b. Abdullah ve İbrahim b. Ahmed ve Abdullah Ağa b. Haydar Paşa li-ecli’ş-şehâde meclis-i şer‘a hâzırân olup istişhâd olundukda fi’l-vâki‘ müteveffâ-yı mezbûr Ser-kâtib Ahmed Ağa b. Mustafa Efendi b. Bekir hayâtında târîh-i kitâbdan dört sene mukaddem marrü’l-beyân bir re’s demirkırı tayını ve kadife eyerini safka-i vâhide ile bizim huzûrumuzda mezbûr el-Hâc Mustafa’ya hîbe-i sahîha-i tâmme ile hîbe ve temlîk ve teslîm ol dahi meclis-i hîbede ittihâb ve kabz u kabûl etmekle mülk-i mevhûbu olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın vâhib-i mezbûrun fevtiyle(?) hakk-ı rücû‘ sâkıt olmağın mûcebince vasiyy-i merkūm bî-vech mu‘ârazadan men‘ olundu mâ-vaka‘a kayd-şüd. Fî 28 min-Safer sene 1110 Şuhûdü’l-hâl: el-Hâc Hüseyin b. Hamza, İbrahim Çelebi b. Mehmed Muhzır, el-Hâc Abdullah [b.] Mehmed Çukadâr, Mehmed Ağa b. Ahmed Çavuş