Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 301 Hüküm no: 190 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vefat eden Fatıma Hatun’un kendisini vasi tayin ettiğini ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i şerîfden me’zûnen Mevlânâ Mehmed Rûşenî Efendi irsâl olunup ol dahi mahmiye-i İstanbul’da Yavaşça Şahin mahallesinde sâkin hâfızü’l-kitâb el-Hâc Mustafa b. Ahmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mezbûr el-Hâc Mustafa meclis-i mezbûrda mahalle-i mezbûrede sâkine iken bundan akdem vefât eden Fâtıma Hatun bt. Mehmed’in sadriye kebîre kızı olmağla terekesine bi’l-verâse vaz‘-ı yed eden zâtı mahalle-i mezbûre sükkânından Hüseyin Efendi b. Hasan ve Mahmud Efendi b. Mehmed ta‘rîfleriyle mu‘arrefe olan zevcesi Âişe Hatun bt. Mehmed mahzarında üzerine da‘vâ ve takrîr-i kelâm edip kaynanam müteveffât-ı mezbûre Fâtıma Hatun bt. Mehmed b. Abdullah fevtinden altı gün mukaddem hâl-i marazında bi-emrillâhi te‘âlâ vefât ettiğimde mecmû‘-ı malımdan vech-i mesnûn üzere techîz ve tekfînim görüldükden sonra cümle malımın sülüsü ifrâz olunup sülüs-i mezbûrdan elli guruşu ile eyyâm-ı mübârekede tabh-ı ta‘âm ve it‘âm-ı fukarâ oluna ve sülüs-i mezbûrdan her ne bâkī kalırsa kızım oğlu olup vârisim olmayan işbu Abdullah Beşe’ye verile deyü vasiyet ve tenfîzine huzûr-ı Müslimînde beni vasiyy-i muhtâr nasb ü ta‘yîn ben dahi muvâcehesinde ba‘de’l-kabûl musırraten-aleyhâ vefât edip tenfîz-i vesâyâ murâd eylediğimde kızı mezbûre mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mu‘arrifân-ı mezbûrân Hüseyin Efendi b. Hasan ve Mahmud b. Mehmed ve Ahmed Çelebi b. Abdüsselam li-ecli’ş-şehâde meclis-i ma‘kūd-ı mezbûra hâzırûn olup istişhâd olunduklarında fi’l-hakīka müteveffât-ı mezbûre Fâtıma Hatun bt. Mehmed b. Abdullah fevtinden altı gün mukaddem hâl-i marazında bi-emrillâhi te‘âlâ vefât ettiğimde mecmû‘-ı malımdan vech-i mesnûn üzere techîz ve tekfînim görüldükden sonra cümle malımın sülüs-i mezbûrdan elli guruşu ile eyyâm-ı mübârekede tabh-ı ta‘âm ve it‘âm-ı fukarâ oluna ve sülüs-i mezbûrdan her ne bâkī kalırsa kızım oğlu olup vârisim olmayan işbu Abdullah Beşe’ye verile deyü vasiyet ve tenfîzine bizim huzûrumuzda dâmadı müdde‘î-i mezbûr el-Hâc Mustafa’yı vasiyy-i muhtâr nasb ü ta‘yîn ol dahi muvâcehesinde ba‘de’l-kabûl musırraten-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm [54a] vâki‘ hâli mevlânâ-yı mezbûr mahallinde tahrîr ba‘dehû ma‘an mürsel İbrahim Çelebi b. Mehmed ve Molla İsmail Beşe [b.] Zülfikâr ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 28 min-Safer sene 1110 Şuhûdü’l-hâl: Hasan Çelebi b. el-Hâc Hüseyin, el-Hâc Mehmed b. Mukim, Mehmed Beşe b. Süleyman, Müezzin el-Hâc Mustafa Efendi b. Cafer, Abdullah Çelebi b. Mustafa, Mehmed Çelebi b. İbrahim