Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 303 Hüküm no: 192 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Efendi’nin vefat eden Abdurrahman Ağa’da alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘den me’zûnen Mevlânâ Mehmed Efendi b. Mahmud irsâl olunup ol dahi mahmiye-i İstanbul’da el-Hâc Evliyâ mahallesinde sâkine Saraylı Hadîce Hatun bt. Abdullah’ın menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i şerîf ettikde mahrûse-i Galata’ya tâbi‘ kasaba-i Beşiktaş mahallâtından Sinan Paşa-i atîk mahallesi sâkinlerinden hâfızü’l-kitâb Salih Efendi b. Mehmed meclis-i ma‘kūd-ı mezbûrda mezbûre Hadîce Hatun’un zevci olup devletlü sa‘âdetlü Beyhan Sultan -dâmet-ismetuhâ ve istakarret-azametühâ- hazretlerinin kethüdâları iken bundan akdem vefât eden Abdurrahman Ağa b. Şa‘bân b. Abdullah’ın sagīr oğlu Ahmed ve sagīre kızları Âişe ve Fâtıma’nın tesviye-i emrlerine kıbel-i şer‘den mansûb vasîleri olmağla terekesine vaz‘-ı yed eden Ali Efendi b. Ahmed ve merkūme Hadîce Hatun tarafından husûs-ı âti’l-beyânda husûmet ve redd-i cevâba müseccel vekîli el-Hâc Hüseyin b. Ebubekir mahzarlarında üzerlerine da‘vâ ve takrîr-i kelâm edip müteveffâ-yı mezbûr Abdurrahman Ağa b. Şa‘bân b. Abdullah zimmetinde işbu imzâ ve hatmiyle mümzâ ve mahtûm ve bin yüz üç Rebî‘ülâhiri’nin üçüncü günüyle müverrah deyn temessüğü nâtık olduğu üzere cihet-i karzdan sekiz yüz seksen guruş hakkım olup meblağ-ı mezbûrun üç yüz guruşunu ağa babası Kadri Ağa’dan havâle etmekle bana vâsıl olup meblağ-ı bâkī beş yüz seksen guruş zimmetinde kalıp hattâ hâl-i kemâl-i sıhhatinde fevtinden altı ay mukaddem meblağ-ı bâkī-i mezbûr zimmetinde bana edâsı lâzım deyni olduğunu huzûr-ı Müslimînde ikrâr ve bizi işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden zikr olunan Sinan Paşa-i atîk mahallesinde sâkin Ahmed Bey b. Mustafa ve kasaba-i Fındıklı’da hâlâ Kapudan Paşa sarayında sâkin el-Hâc Ahmed b. Mustafa ve mahmiye-i merkūmede Kabasakal mahallesinde sâkin Salih Çelebi b. Ebubekir li-ecli’ş-şehâde meclis-i ma‘kūd-ı mezbûra hâzırûn olup istişhâd olunduklarında fi’l-hakīka müteveffâ-yı mezbûr Abdurrahman Ağa b. Şa‘bân b. Abdullah fevtinden altı ay mukaddem işbu müdde‘î-i mezbûr Salih Efendi’ye cihet-i merkūmeden bâkī beş yüz seksen guruş zimmetinde edâsı lâzım deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr el-Hâc Süleyman b. ( ) ve Hasan Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî gurre-i şehri Rebî‘ülevvel sene 1110 Şuhûdü’l-hâl: el-Hâc Mehmed b. Ahmed, el-Hâc Salih b. Ahmed, Mehmed Çelebi b. Rıdvan, Ahmed Çelebi b. Mehmed Sıdkı, Abdurrahman Efendi b. Mahmud, Mehmed Bey b. Abdullah, İbrahim Halîfe b. Edhem, İbrahim Bey b. Abdi, Süleyman b. Abdullah