Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 304 Hüküm no: 193 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Eyüb Ağa’nın varislerinin miras hususunda sulh oldukları Mahmiye-i İstanbul’da Demirkapı kurbünde Elvanzâde mahallesinde sâkin iken bundan akdem vefât eden Eyüb Ağa b. el-merhûm Mimâr Ali Ağa’nın verâseti zevce-i menkûha-i metrûkesi Rukiye Hatun bt. Hasan Ağa b. Abdullah ile vâlidesi Hamide Hatun bt. Haydar’a ve kebîre kızı Emetullah ile sagīr oğulları Mehmed ve Ahmed’e ve sagīre kızı Âişe’ye münhasıra olup kable’l-kısme mezbûre [Hamide] hatun dahi vefât edip verâseti kebîre kızı Fâtıma Hatun ile oğlu müteveffâ-yı mezbûr Eyüb Ağa’nın evlâdı mezbûrûn Mehmed ve Ahmed ve Emetullah ve Âişe’ye münhasıra olup kable’l-kısme mezbûr Mehmed dahi vefât edip verâseti vâlidesi mezbûre Rukiye Hatun ile li-ebeveyn er karındaşı mezbûr Ahmed’e ve li-ebeveyn kız karındaşları mezbûretân Âişe ve Emetullah Hatun’a münhasıra olup kable’l-kısme mezbûre Âişe dahi vefât edip verâseti vâlidesi mezbûre Rukiye Hatun ile li-ebeveyn er karındaşı mezbûr Ahmed’e ve li-ebeveyn [kız] karındaşı mezbûre Emetullah Hatun’a münhasıra olup kable’l-kısme mezbûr Ahmed dahi vefât edip verâseti vâlidesi mezbûre Rukiye Hatun ile li-ebeveyn kız karındaşı mersûme Emetullah Hatun’a ve asabe-i nesebiyeleri Sadık Çelebi b. Mehmed ve Hasan b. Veli’ye münhasıra ve tashîh meselesi bi-hükmi’l-münâsahati’ş-şer‘iyye yüz seksen altı bin altı yüz yirmi dört sehmden olmağla sihâm-ı mezbûrenin dört mertebede altmış yedi bin altmış altı sehmi mezbûre Rukiye’ye ve bir mertebede on beş bin beş yüz elli iki sehmi merkūme Fâtıma Hatun’a ve beş mertebede seksen dokuz bin yüz kırk sekiz sehmi merkūme Emetullah Hatun’a ve birer mertebede yedişer bin dörder yüz yirmi dokuzar sehmi mezbûrân Sadık Çelebi ve Hasan Çelebi’den her birine isâbeti tahakkukundan sonra mezbûrân Sadık Çelebi ve Hasan Çelebi mahfil-i kazâda mezbûrât Rukiye Hatun ve Emetullah Hatun ve Fâtıma Hatun taraflarından husûs-ı âti’l-beyânı tasdîka vekîl-i müseccelleri işbu hâfızü’l-kitâb Mehmed Efendi b. Ramazan mahzarında her biri ikrâr ve takrîr-i kelâm edip evvelâ vefât eden merkūm Eyüb Ağa’nın işbu defter-i kassâm-ı askerî mûcebince tereke-i menkūlesi esmânı düyûn-ı müsbetesine verildikden sonra dâhil-i defter olup mahalle-i mezbûrede vâki‘ inde’l-ahâlî ve’l-cîrân ma‘lûmü’l-hudûd yüz on bir bin akçe kıymetli menzili mu‘ayyen oldukdan sonra müteveffâ-yı mezbûrun zimmetinde müvekkile-i merkūme Rukiye Hatun’un iki bin guruş hakkı olduğu vech-i şer‘î üzere sâbit oldukda menzil-i mezkûru dahi deyn-i merkūm iki bin guruş mukābelesinde müvekkile-i mezbûreye teslîm eylediğimizden sonra defter-i mezbûrdan hâric müteveffâ-yı mezbûr Eyüb Bey menziline muttasıl mülk arsasından dahi tashîh-i mezbûr üzere bize isâbet eden on dört bin sekiz yüz elli sekiz sehmimizi müvekkilât-ı merkūmâtdan da‘vâ ve taleb ettiğimizde onlar dahi mârrü’z-zikr arsa müteveffâ-yı [mezbûr] Eyüb Ağa’nın dâhil-i mülkünde değildir deyü inkâr etmekle beynimizde nizâ‘-ı kesîre vâki‘ olmuşidi el-hâletü hâzihi muslihûn tavassut edip da‘vâ-yı mezkûremizden fâriğ olmak üzere altmış guruşa müvekkilât-ı mezbûrât bizimle sulh olduklarında <> biz dahi sulh-ı mezbûru kabûl ve bedel-i sulh olan meblağ-ı merkūm altmış guruşu yedlerinden tamâmen ahz u kabz eyledik ba‘de’l-yevm âhiren vefât eden mezbûr Ahmed’in terekesinden dâhil-i defter ve hâric ez defter hissemize isâbet eden cemî‘ mîrâs da‘vâsından merkūmât Rukiye Hatun ve Emetullah Hatun ve Fâtıma Hatun’un zimmetlerini ibrâ-i âmm-ı kâtı‘u’n-nizâ‘la ibrâ ve iskāt eyledik dediklerinde gıbbe’t-tasdîkı’ş-şer‘î mezbûrân Sadık Çelebi ve Hasan Çelebi yine mahfil-i kazâda sâniyen vefât eden merkūme Hamide Hatun’un li-ebeveyn karındaşı el-Hâc Mustafa muvâcehesinde her biri takrîr-i kelâm edip müteveffâ-yı mezbûre Hamide Hatun’un terekesinden karındaşı olmağla ba‘zı eşyâ-i ma‘lûme ketm ü ihfâ eyledin deyü merkūm el-Hâc Mustafa’dan da‘vâ etmiş idik el-hâletü hâzihi da‘vâ-yı mezkûremizden dahi mezbûr el-Hâc Mustafa’nın zimmetini ibrâ ve iskāt eyledik dediklerinde gıbbe’t-tasdîk kayd-şüd. Fî 28 Zilhicce sene [1]109 Şuhûdü’l-hâl: Hüseyin Efendi İmâm-ı Mimârhâne, Hasan Efendi el-Kâtib, Abdurrahman Çelebi, Mehmed Ağa Pazarî-i Saray-ı Cedîd, Kalaycı Bayram, Ahmed Çelebi b. Süleyman Üsküdarî, Bosnavî Oruc Efendi, el-Hâc Mustafa Odabaşı, Mahmud Çelebi b. Hüseyin, Hüseyin Çelebi b. Mehmed, Hasan Çelebi b. Abdullah