Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 307 Hüküm no: 195 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Çelebi’den intikal eden evin, çocukların nafakası için satılması Mahmiye-i İstanbul’da Sofular mahallesinde sâkin iken bundan akdem vefât eden es-Seyyid Hasan Çelebi b. es-Seyyid Mehmed’in evlâd-ı sıgārı Mehmed ve Mustafa ve Hadîce ve Emine’nin tesviye-i emrlerine kıbel-i şer‘den mansûb vasîleri bâ‘isü’l-kitâb Mustafa Çelebi b. Mahmud mahfil-i kazâda takrîr-i kelâm edip mahalle-i mezbûrede vâki‘ bir tarafdan Hasan Mübeşşir menzili ve iki tarafdan Âişe Hatun menzili ve bir tarafdan tarîk-i hâssa müntehî arsası merhûme Fâtıma Hatun Vakfı’ndan olup ebniyesi müteveffâ-yı mezbûrun ile’l-vefât yedinde mülk ve hakkı olduğu müsbet ve ba‘de vefâtihî evlâdı sıgār-ı mezbûrûna intikāl eden menzil harâba müşrif olup hâsılı harcına vefâ etmediğinden mâ‘adâ sagīrlerin nafaka ve kisveye eşedd-i ihtiyâc ve ebniye-i memlûke-i mezbûreden gayrı ism-i mal ıtlâk olunur bir şeyleri olmamağla menzil-i mahdûd-ı mezkûru ba‘de’l-müzâyede semen-i misli ile âhara bey‘a ve semeni istirbâh ve istiğlâl olunmak sagīr haklarında nef‘-i mahz olmağın ber-vech-i muharrer cânib-i şer‘den izin taleb ederim dedikde vasiyy-i mezbûrun kelimât-ı meşrûhası vâkı‘a mutâbıka idiği mahalle-i mezbûre ahâlîsinden İsmail Çelebi b. Ali ve Ömer Ağa b. Mehmed ve Abdullah Çelebi b. Ali ve Mehmed Çelebi b. Ahmed haberleriyle lede’ş-şer‘i’l-enver zâhir ve mukarrer olmağla menzil-i mahdûd-ı mezkûru vech-i muharrer üzere semen-i misli ile âhara bey‘a hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri vasiyy-i mezbûr Mustafa Çelebi’ye izin vermeğin mâ-vaka‘a kayd-şüd. Fî gurre-i Rebî‘ülevvel sene 1110 Şuhûdü’l-hâl: Abdurrahman Efendi b. el-merhûm Ahmed Efendi, Hasan Çelebi b. Abdullah, Mehmed Efendi b. Pîrî, İbrahim Çelebi b. Mehmed, Ömer Ağa b. Mehmed, İsmail Çelebi b. Ali