Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 307 Hüküm no: 196 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Bakırcı Ali Çelebi’den kızı Zeyneb’e intikal eden oda hissesinin satışına izin verildiği Mahmiye-i İstanbul’da Aksaray kurbünde Kethüdâ Bey Vakfı olan müteehhilîn odalarının birinde icâre-i mu‘accele ve ayda kırk akçe icâre-i müeccele ile mutasarrıf iken bundan akdem vefât eden Bakırcı Ali Çelebi b. Abdullah’ın sagīre kızı Şerife Zeyneb’in tesviye-i umûruna taraf-ı şer‘den mansûb vasîsi olan Mehmed Çelebi b. Nasrullah meclis-i şer‘de takrîr-i kelâm edip müteveffâ-yı merkūm Ali Çelebi’nin ber-vech-i mübeyyin tasarrufunda olup mahall-i mezbûrda vâki‘ bir tarafı Hasan Ağa çeşmesi ve iki tarafı Suyolcu kızı ve Çadırcı Mustafa mutasarrıf oldukları odalar ve bir tarafdan tarîk-i âmla mahdûd bir bâb fevkānî oda ve tahtında mahtabı müştemil vakıf oda-i mezbûra sagīr oğlu Abbas ve sagīre kızı mezbûre Zeyneb’e intikāl-i âdî ile intikāl edip ba‘dehû mezbûr Abbas bilâ-veled fevt olmağla nısf hissesi taraf-ı vakfdan âhara îcâr olunmağla sagīre hissesi mâil-i intifâ‘ kalmayıp bekāsı sagīreye muzır ve hâsılı harcına vefâ etmemekle bedel-i misli ve izn-i mütevellî ile âhara tefvîz ve bedelini istirbâh hakkında nef‘-i mahz olmağla husûs-ı mezbûra me’zûn olmak matlûbumdur dedikde vasiyy-i merkūmun kelimâtı vâkı‘a mutâbık olduğu zeyl-i kitâbda muharrerü’l-esâmî Müslimîn ihbârlarıyla lede’ş-şer‘ müte‘ayyin olmağla hisse-i mezbûre ber-vech-i meşrûh üzere ferâğa vasiyy-i merkūma taraf-ı şer‘den izin verilip mâ-vaka‘a kayd-şüd. Fî gurre-i şehri Rebî‘ülevvel sene 1110 Şuhûdü’l-hâl: es-Seyyid Hüseyin Çelebi b. Şa‘bân, Salih Çelebi b. Mustafa, İbrahim b. Mustafa, Ahmed b. Abdullah, Kara Mehmed.