Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 311 Hüküm no: 198 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Velisi bulunmayan Mehmed Said Efendi kızı Emetullah’ın Osman Çelebi’ye nikâhlandığı Elhamdü lillâhi’llezî ahalle’n-nikâhe ve harreme’s-sifâh ve’s-salâtü ve’s-selâmü alâ-nebiyyihî Muhammedin fî-küllî mesâ’ ve mesâin ve sabâhin ve alâ-âlihî ve ashâbihî zevi’l-felâh ve’n-necâh mahmiye-i İstanbul’da Debbâğzâde mahallesinde sâkin iken bundan akdem vefât eden Abdullahzâde denmekle şehîr Mehmed Said Efendi’nin sagīre kızı Emetullah’ın ashâb-ı ferâizinden ve asabâtdan ve zevi’l-erhâmdan veliyy-i veliyyesi olmamağla hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīre-i mezbûreyi sağ on iki bin akçe mehr-i müeccel tesmiyesiyle işbu hâfızü’l-kitâb Osman Çelebi b. Hüseyin’e lede’ş-şuhûd uhde ve menşûrunda inkâh-ı sagīreye velâyeten me’zûn olduğu musarrah olmağın bi-hasebi’l-velâye tezvîc ettikde ol dahi sagīre-i mezbûreyi zikr olunan sağ on iki bin akçe mehr-i müeccel tesmiyesiyle tezevvüc ve kabûl etmeğin mâ-vaka‘a kayd-şüd. Fî 3 min-şehri Rebî‘ülevvel sene 1110 Şuhûdü’l-hâl: Ahmed Şemsi Efendi b. Mehmed Emin Efendi, es-Seyyid Abdullah Efendi b. el-merhûm Mehmed Efendi, Abdurrahman Efendi b. Hanefi İmâm, Mustafa b. Abdülaziz el-Müezzin, Mehmed Efendi b. Hasan Efendi, el-Hâc Halil b. Yahya, Mustafa b. Abdullah, Molla Mehmed b. Ömer, Osman Efendi b. Siyami, Abdullah Çelebi b. Mehmed Hammâmî, Abdurrahman b. Hasan, Mustafa b. Hasan, Hasan Çelebi b. Abdullah, Kara Mehmed b. Hasan, el-Hâc Süleyman Beşe Çukadâr