Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 316 Hüküm no: 204 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un varislerinin hisse taksimi davasında sulh oldukları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen Rûşenî Mehmed Efendi irsâl olunup ol dahi mahmiye-i İstanbul’da Yavaşça Şahin mahallesinde sâkine iken bundan akdem vefât eden Fâtıma Hatun bt. Mehmed’in ile’l-vefât sâkine olduğu menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffât-ı mezbûrenin verâseti sadriye kebîre kızı Âişe Hatun bt. Mehmed ile li-ebeveyn kız karındaşı Saliha Hatun bt. Mehmed’e münhasıra olduğu şer‘an zâhir ve mütebeyyin oldukdan sonra zâtı medîne-i Üsküdar mahallâtından Debbâğlar mahallesi sükkânından Mehmed Çelebi b. Veliyüddin ve Hasan Çelebi b. Süleyman ta‘rîfleriyle mu‘arrefe olan kız karındaşı mezbûre Saliha Hatun meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olmağla terekesine bi’l-verâse vaz‘-ı yed eden kızı bâ‘isetü’l-kitâb mezbûre Âişe Hatun muvâcehesinde ikrâr ve takrîr-i kelâm edip kız karındaşım müteveffât-ı mezbûrenin terekesi tahrîr ve ba‘de ihrâci’l-mesârif ve’s-sülüs para üçer akçe hesâbınca benim hisse-i irsiyeme altı bin elli üç akçe isâbet ve intikāl eyledikden sonra mezbûre Âişe Hatun müteveffât-ı mezbûrenin terekesinden olmak üzere otuz aded eşrefî altın ve Gülbuy nâm işbu câriye ve yirmi guruş kıymetli <> bir çift altın bilezik ve on guruş kıymetli beş aded çatkı ve üç guruş kıymetli bir altın yüzük ve iki guruş kıymetli bir pîrûze yüzük ve mecmû‘u on guruş kıymetli iki top bez ve iki güğüm ve iki tepsi ve bir leğen ve ibriği ketm ü ihfâ etmişdir deyü mezbûre Âişe’den hissemi taleb ve da‘vâ ve mezbûre inkâr edip beynimize muslihûn tavassut eyledikde mezbûre Âişe fedâen li’l-yemîn an-inkârin bana hisse-i irsiyemden bâ-defter-i kassâm mezbûr üzere dört bin akçe dahi def‘ u teslîm ve meblağ-ı mezbûr üzere inşâ-i akd-i sulh ettikde ben dahi sulh-ı mezbûru kabûl ve bedel-i sulh olan meblağ-ı mezkûr dört bin akçe ile ber-mûceb-i defter-i kassâm-ı askerî hisse-i irsiyeme isâbet eden altı bin elli üç akçeyi işbu meclisde yedinden tamâmen ahz u kabz eyledim kız karındaşım müteveffât-ı mezbûrenin terekesinden olup medîne-i Üsküdar’da Ahmed Çelebi mahallesinde vâki‘ lede’l-ahâlî ve’l-cîrân ma‘lûmü’l-hudûd bir mülk menzil beynimizde mîrâs olmak üzere ibkā olundukdan sonra müteveffât-ı mezbûrenin cemî‘ mîrâsına müte‘allıka âmme-i da‘vâ ve mutâlebât ve eymân [ve] muhâsamâtdan kızı mezbûrenin zimmetini ibrâ-i âm ile ibrâ ve iskāt eyledim ol dahi bana an-inkârin medfû‘u olan meblağ-ı merkūm dört bin akçeden benim zimmetimi ibrâ eyledi ba‘de’l-yevm husûs-ı mîrâsa müte‘allıka bendan veyâ vekîlimden da‘vâ ve nizâ‘ sudûr ederse inde’l-hükkâmi’l-kirâm mesmû‘a olmasın dedikde gıbbe’t-tasdîk vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Nasuh Çelebi b. Yusuf ve Mehmed Beşe b. Hüseyin ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 5 min-şehri Rebî‘ülevvel sene 1110 Şuhûdü’l-hâl: Rıfkızâde Şa‘bân Ağa b. es-Seyyid İbrahim, es-Seyyid Mehmed Çelebi b. el-Hâc Bekir, Hüseyin Efendi b. Hasan, Fazlullah Çelebi b. Ahmed, Hasan Çelebi b. Hüseyin, Mahmud Çelebi [b.] Mustafa.