Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 324 Hüküm no: 212 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâğıtçı Abdullah Çelebi’den varislerine intikal eden evin varislerce satışına izin verildiği Mahmiye-i İstanbul’da Yakub Ağa mahallesinde sâkin iken bundan akdem vefât eden Kâğıdcı Abdullah Çelebi b. Mehmed’in sagīre kızı Afife’nin vâlidesi ve tesviye-i umûruna kıbel-i şer‘den mansûbe vasiyesi bâ‘isetü’l-kitâb Havva Hatun bt. Abdullah meclis-i şer‘-i şerîfde takrîr-i kelâm edip merhûm Hattat Hürrem Bey Vakfı’ndan olmağla icâreteyn-i ma‘lûmeteyn ile müteveffâ-yı mezbûrun taht-ı tasarrufunda olup ba‘de vefâtihî evlâdları kebîr oğlu İbrahim ve kebîre kızları Âişe ve Hadîce’ye ve kızım sagīre-i mezbûre Afife’ye intikāl edip mahalle-i mezbûrede vâki‘ vakıf menzilden zikr olunan kebîrler hisselerini âhara ferâğ murâd etmeleriyle sagīrenin hissesini nef‘ ve ber-vech üzere ifrâz <> mümkün olmadığından mâ‘adâ harâba müşrif olup hâsılı harcına vefâ etmemeğin zikr olunan menzilden sagīre-i mezbûrenin hissesini dahi ma‘an bedel-i <> misli ile âhara ferâğ nef‘-i mahz olmağın kıbel-i şer‘den vech-i muharrer üzere me’zûne olunmak matlûbumdur dedikde vasiye-i mezbûrenin kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘ zâhir olmağın hâkim-i muvakkı‘-i sadr-ı kitâb tûbâ-lehû ve hüsnü-meâb efendi zikr olunan menzilden sagīre-i mezbûrenin hissesini izn-i mütevellî ve bedel-i misli ile âhara ferâğa vasiye-i mezbûreye kıbel-i şer‘den izin birle mâ-vaka‘a kayd-şüd. Fî 4 Rebî‘ülevvel sene 1110 Şuhûdü’l-hâl: Mehmed Çelebi b. Ahmed, Koru(?) Mehmed Çelebi b. İbrahim, Abdullah Çelebi b. Ali, el-Hâc Abdullah Çukadâr, Ali Efendi b. Mehmed.