Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 323 Hüküm no: 211 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahbaz Hatun’un vefat eden kocası İsmail Efendi’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri içün cânib-i şer‘den me’zûnen irsâl olunan Mevlânâ Abdurrahman Efendi b. el-merhûm Ahmed Efendi mahmiye-i İstanbul’da Molla Hüsrev mahallesi ahâlîsinden olup bundan akdem vefât eden İsmail Efendi b. Mehmed Beşe b. Şakir’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan hâfızatü’l-kitâb Şahbaz Hatun bt. Abdullah meclis-i ma‘kūd-ı mezbûrda müteveffâ-yı mezbûrun sagīr oğlu Mehmed ve sagīre kızı Âişe’nin tesviye-i emrlerine tashîhan li’s-sak vasî nasb olunan Yunus b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr İsmail Efendi b. Mehmed zimmetinde cihet-i karz-ı şer‘îden yetmiş iki buçuk guruş hakkım olup hattâ hâl-i kemâl-i sıhhatinde cihet-i mezbûreden zimmetinde bana ol kadar guruş deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahalle-i mezbûre ahâlîsinden Mehmed Çelebi b. Mahmud ve Abdullah b. Siyavuş li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka müteveffâ-yı mezbûr İsmail Efendi b. Mehmed b. Şakir hâl-i kemâl-i sıhhatinde işbu zevcesi müdde‘iye-i mezbûre Şahbaz Hatun’a zimmetimde cihet-i karzdan yetmiş iki buçuk guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli [mevlânâ-yı mezbûr] mahallinde tahrîr ve ma‘an mürsel Çukadâr el-Hâc Süleyman ve Hasan Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 5 min-Rebî‘ülevvel sene 1110 Şuhûdü’l-hâl: el-Hâc İbrahim Efendi b. Halil İmâm, Mehmed Efendi b. Rıdvan, Ahmed Çelebi b. Hasan, Siyavuş Ağa b. Abdullah, el-Hâc Abdullah b. Abdullah, Hasan b. Abdullah.