Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 325 Hüküm no: 214 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahbaz Hatun’un vefat eden kocası İsmail Efendi’deki mehir bedelinin terekesinden ödenmesi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen Mevlânâ Abdurrahman Efendi b. el-merhûm Ahmed Efendi irsâl olunup ol dahi mahmiye-i İstanbul’da Molla Hüsrev mahallesi ahâlîsinden olup bundan akdem vefât eden İsmail Efendi b. Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olduğunu iddi‘â edip zâtı ba‘de’t-ta‘rîfi’ş-şer‘î mu‘arrefe olan hâfızatü’l-kitâb Şahbaz Hatun bt. Abdullah meclis-i ma‘kūd-ı mezbûrda müteveffâ-yı mezbûrun sagīr oğlu Mehmed ve sagīre kızı Âişe’nin tesviye-i emrlerine tashîhan li’d-da‘vâ vasî nasb olunan Yusuf b. Abdullah mahzarında üzerine da‘vâ ve takrîr-i kelâm edip ben müteveffâ-yı mezbûr İsmail Efendi b. Mehmed b. Şakir’in memlûke câriyesi olduğum hâlde hasbeten lillâhi te‘âlâ beni malından tahrîr ve i‘tâk ettikden sonra târîh-i kitâbdan altı ay mukaddem huzûr-ı Müslimînde altı bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken mehr-i mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahalle-i mezbûre ahâlîsinden Hasan Beşe b. İbrahim ve Siyavuş Ağa b. Abdullah li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka müteveffâ-yı mezbûr İsmail Efendi b. Mehmed b. Şakir müdde‘iye-i mezbûre Şahbaz mülkünde olduğu hâlde hasbeten lillâhi te‘âlâ malından tahrîr ve i‘tâk ettikden sonra târîh-i kitâbdan altı ay mukaddem altı bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr el-Hâc Süleyman ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 5 Rebî‘ülevvel sene 1110 Şuhûdü’l-hâl: el-Hâc İbrahim b. Halil İmâm, Mehmed Efendi b. Rıdvan, Abdullah b. Siyavuş, Ahmed Çelebi b. Hasan.