Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 326 Hüküm no: 215 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yahya Çavuş’un evinin zevcesi Râbia Hatun’a satıldığı Mahmiye-i İstanbul’da Ördek Kasab mahallesi ahâlîsinden olup bundan akdem düyûnu terekesinden ezyed olduğu hâlde <> Burgos nâm kasabada vefât eden Yahya Çavuş b. Yusuf’un tesviye-i umûruna kıbel-i şer‘den vasî ve kayyım nasb olunan Abdullah Çelebi b. Ali meclis-i şer‘-i hatîr-ı lâzımü’t-tevkīrde müteveffâ-yı mezbûrun zevce-i metrûkesi olup zâtı ta‘rîf-i şer‘î ile mu‘arrefe olan hâfızatü’l-kitâb Râbia Hatun bt. Ramazan mahzarında ikrâr ve takrîr-i kelâm edip müteveffâ-yı mezbûrun tereke-i menkūlesi düyû[n-ı] müsbetesine vefâ etmeyip emlâkinin bey‘i lâzım gelmeğin müteveffâ-yı mezbûrun hîn-i fevtine değin yedinde mülk ve hakkı idiği müsbet olup mahalle-i mezbûrede vâki‘ bir tarafdan mahalle-i mezbûre câmi‘i vakfı olan menzil ve bir tarafdan imâma meşrûta olan menzil ve ba‘zan Mustafa Efendi Vakfı olan menzil ve bir tarafdan Taşçı Ali Çelebi odaları ve bir tarafdan tarîk-i âmma müntehî hâriciyesi fevkānî iki bâb oda ve bir sofa ve tahtânî bir oda ve bir ahır ve dâhiliyesi bir oda ve üç sofa ve bi’r-i mâ ve kenîf ve bahçeyi müştemil menzil münâdîlerden Mustafa b. Muslu yediyle sûk-ı sultânîde ve mecma‘ [-ı nâs] olan mevâzi‘de bir ay mikdârı nidâ ve müzâyede olunup rağabât-ı nâs bi’l-külliye münkatı‘a oldukdan sonra mezbûre Râbia üzerinde üç yüz on guruşda karâr edip ziyâde ile tâlib-i âhar zuhûr etmeyip ve menzil-i mezbûrun meblağ-ı merkūm hîn-i akdde semen-i misli olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’ş-şerîf zâhir olmağla ben dahi menzil-i mahdûd-ı mezbûru bi-cümleti’t-tevâbi‘ ve’l-levâhık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Râbia Hatun’a üç yüz on guruşa safka-i vâhide ile bey‘ u temlîk ve teslîm ol dahi vech-i muharrer üzere iştirâ ve temellük ve tesellüm ve kabûl eyledikden sonra semeni olan meblağ-ı mezbûru mezbûre Râbia Hatun yedinden tamâmen alıp kabz eyledim ba‘de’l-yevm menzil-i mahdûd-ı mezbûr mezbûre Râbia’nın mülk-i müşterâsıdır keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a kayd-şüd. Fî gurre-i Rebî‘ülevvel sene 1110 Şuhûdü’l-hâl: İshak Efendi b. Ali, Ali Çelebi b. Mehmed Camcı, el-Hâc Ahmed b. Mehmed, Mustafa Çelebi b. Ahmed, Hüseyin Çelebi b. Mehmed, Hüseyin Çelebi b. Cafer.