Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 329 Hüküm no: 218 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mustafa Beşe’nin Dergâh-ı âlî Yeniçerilerinin Onuncu Bölük Odası Para Vakfı’na olan borcunun sulh yoluyla tahsili Dergâh-ı âlî yeniçerilerinin onuncu bölük odası mühimmâtına mevkūfe nukūdun bi’l-fi‘il mütevellîsi hâfızü’l-kitâb Hasan Beşe b. Ali mahfil-i kazâda mahmiye-i İstanbul’da Çakır Ağa mahallesinde sâkin iken bundan akdem [vefât eden] Mustafa Beşe b. Ali’nin hasren vârisesi ve vâlidesi olup zâtı ta‘rîf-i şer‘î ile mu‘arrefe olan Âişe Hatun bt. Murad mahzarında üzerine da‘vâ ve takrîr-i kelâm edip müteveffâ-yı mezbûr Mustafa Beşe ile şerîki gāib ani’l-meclis Hindî Mehmed zimmetlerinde işbu hüccet-i şer‘iyye mûcebince asıl mal-ı vakf-ı mezbûrdan sekiz yüz dört guruş ve devr-i şer‘î ile ilzâm olunan ribhden dahi yüz otuz guruş ki min-haysü’l-mecmû‘ dokuz yüz otuz dört guruşdan mezbûr Hindî Mehmed’in zimmeti berî olmak üzere mezbûre Âişe Hatun ile dört yüz guruş ile beş yüz otuz dört guruş hediyeli bir Mushaf-ı şerîf üzerine sulh olduğumuzdan sonra bedel-i sulh olan meblağ-ı mezbûr dört yüz guruş ile Mushaf-ı şerîfi mezbûre Âişe Hatun’dan taleb ederim suâl olunsun dedikde gıbbe’s-suâl mezbûre Âişe Hatun cevâbında kaziyye bâlâda tafsîli mürûr eden vech üzere olduğunu ikrâr lâkin meblağ-ı mezbûr dört yüz guruşu âcilen edâya iktidârım olmamağla târîh-i kitâbdan otuz gün tamâmına değin tecîl olunmak taleb ederim dedikde mütevellî-i mezbûr dahi meblağ-ı mezbûr dört yüz guruşu târîh-i mezbûra değin tecîl etmeğin mâ-vaka‘a kayd-şüd. Fî 5 Rebî‘ülevvel sene 1110 Şuhûdü’l-hâl: Mustafa b. Şa‘bân, Mustafa Çavuş el-Mübâşir, Nasuh Beşe b. ( ) Çukadâr, Hüseyin Beşe b. Mehmed, Mehmed b. Hüseyin, İbrahim b. Mehmed.