Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 329 Hüküm no: 219 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin vefat eden ortağı Bakkal Veli’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen ba‘s olunan Mevlânâ İbadzâde es-Seyyid Abdullah Efendi b. el-merhûm es-Seyyid Mustafa Efendi mahmiye-i İstanbul’da Fenâyî Dede mahallesi ahâlîsinden olup Hayrabolu kazâsı kurbünde maktûlen vefât eden Bakkāl el-Hâc Veli b. İbrahim b. Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûrede sâkin işbu bâ‘isü’l-kitâb İbrahim Beşe b. Mustafa meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi ve sagīre kızı Fâtıma’nın vâlidesi ve tesviye-i umûruna kıbel-i şer‘-i enverden mansûbe vasiyesi olmağla terekesine vâzı‘atü’l-yed olup zâtı mahalle-i mezbûrede sâkin es-Seyyid Mustafa Çelebi b. es-Seyyid Hasan ve el-Hâc Musa Çelebi b. Süleyman ta‘rîfleriyle mu‘arrefe olan Âişe Hatun bt. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Bakkāl el-Hâc Veli b. İbrahim b. Mehmed ile bundan akdem şirket-i inân ile ben şerîkler olup malımdan müteveffâ-yı mezbûra yüz yetmiş guruşumu def‘ u teslîm ol dahi tesellüm ve kabz eyledikden sonra vücûh-ı ticâretden i‘mâl edip fevtinden iki ay mukaddem mahrûse-i Edirne’de fesh-i akd-i şirket asl-ı malım olan meblağ-ı mezbûr yüz yetmiş guruşu kendiden taleb eylediğimde meblağ-ı mezbûru kendi mesârifime sarfla istihlâk eyledim zimmetimde vâcibü’l-edâ deynimdir deyü şuhûd mahzarında ikrâr dahi etmiş iken kable’l-edâ vefât edip terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden mu‘arrif-i mezbûr es-Seyyid Mustafa Çelebi b. es-Seyyid Hasan ve Bekir Paşa Câmi‘-i şerîfi kurbünde Mustafa Beşe b. Mehmed li-ecli’ş-şehâde meclis-i ma‘kūd-ı mezbûrda hâzırân olup isre’l-istişhâd fi’l-hakīka müteveffâ-yı mezbûr Bakkāl el-Hâc Veli b. İbrahim b. Mehmed işbu müdde‘î-i mezbûr İbrahim Beşe b. Mustafa’ya yüz yetmiş guruşunu kendi mesârifime sarf eyledim zimmetimde vâcibü’l-edâ deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Çukadâr el-Hâc Süleyman ve Hüseyin Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 14 min-Saferi’l-hayr sene 1110 Şuhûdü’l-hâl: Süleyman Çelebi b. Hüseyin, Cafer Çelebi b. Abdullah, Ahmed Çelebi b. Mustafa, Yahya Çelebi b. İsmail, Mustafa Çelebi b. İbrahim, Süleyman Çelebi b. Yusuf, Ahmed Beşe b. Receb.