Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 334 Hüküm no: 225 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Beşe’nin vefat eden Hüseyin Beşe’nin varislerinin kendisini vekil tayin ettiklerini ispat ettiği Fi’l-asl Vilâyet-i Anadolu’da Niğde kazâsına tâbi‘ Gölcük nâm karyeden olup mahmiye-i İstanbul’da Ayazmakapısı dâhilinde yağhânede müsâfiren sâkin iken bundan akdem vefât eden Hüseyin Beşe b. Murad b. Abdullah’ın verâseti karye-i mezbûrede sâkine zevce-i menkûhası Âişe Hatun bt. Mustafa b. Mahmud ile sulbî kebîr oğlu Yakub ve sagīr oğulları Mehmed ve Bektaş ve kebîre kızı Neslihan ve sagīre kızları Fâtıma ve Ümmühani ve Meryem ve babası mezbûr Murad’a münhasıra ve tashîh meselesi iki yüz kırk sehmden olmağla sihâm-ı mezbûrenin otuz sehmi mezbûre Âişe Hatun’a ve kırk sehmi mezbûr Murad’a ve bâkī yüz yetmiş sehmden otuz dörder sehmi mezbûr Yakub ve Mehmed ve Bektaş’dan her birine ve on yedişer sehmi mezbûrât Ümmühani ve Meryem ve Fâtıma ve Neslihan’dan her birine isâbeti tahakkukundan sonra mezbûr Yakub asâleten ve mezbûr Murad b. Abdullah ile zikr olunan sagīrlerin vasiyy-i mansûbeleri ve vâlideleri mezbûre Âişe bt. Mustafa b. Mahmud ve mezbûre Neslihan taraflarından husûs-ı âti’l-beyâna iddi‘â-i vekâlet etmekle vekâleten meclis-i şer‘de müteveffâ-yı mezbûrun terekesini verese-i mezkûresine îsâle vasiyy-i muhtârı olmağla terekesine vâzı‘u’l-yed olup mahmiye-i mezbûrede mârrü’z-zikr yağhânede müsâfiren sâkin olan müteveffâ-yı mezbûrun karındaşı Ömer Beşe b. Murad mahzarında üzerine da‘vâ ve takrîr-i kelâm edip müteveffâ-yı mezbûrun terekesinden olup ba‘de ihrâci’l-mesârif ber-mûceb-i defter-i kassâm-ı askerî para üçer akçe hesâbına makbûzu olan kırk beş bin altı yüz altmış altı akçeyi mezbûr Ömer Beşe’den taleb eylediğimde vermede ta‘allül eder suâl olunup alıverilmesi matlûbumdur dedikde gıbbe’s-suâl mezbûr Ömer Beşe meblağ-ı merkūma defter mûcebince vaz‘-ı yedini ikrâr lâkin mezbûr Yakub’un ber-vech-i muharrer müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı Müslimînden olup mârrü’z-zikr Gölcük nâm karyeden mahmiye-i mezbûrede mezbûr yağhânede müsâfiren sâkin Receb Beşe b. Mehmed ve İskender b. Murad li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûrun zevcesi ve zâtı rü’yetimizle ma‘lûmumuz olup zikr olunan sagīrlerin vasiye-i mansûbeleri ve vâlideleri mezbûre Âişe Hatun bt. Mustafa b. Mahmud ve babası mezbûr Murad b. Abdullah ve mezbûre Neslihan taraflarından müteveffâ-yı mezbûrun terekesini vasiyy-i mezbûrdan ve sâir terekesine vaz‘-ı yed edenlerden taleb ve da‘vâ ve ahz u kabza ve kabz ve îsâl mütevakkıf olduğu umûrun küllîsine mezbûr Yakub’u bizim huzûrumuzda vekîl ve nâib-i menâb eylediler biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 9 Rebî‘ülevvel sene 1110 Şuhûdü’l-hâl: Pîrîzâde Mehmed Efendi, Rûşenî Mehmed Efendi, el-Hâc Mehmed b. İskender, Mehmed Beşe b. Abdullah, İmâmzâde Mehmed, Ali b. Halil, Hasan b. Mustafa, Eyüb b. Halil.