Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 338 Hüküm no: 227 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın vefat eden Hacı Yusuf’da olan alacağını ispat ettiği Mahmiye-i İstanbul’da Mahmudpaşa mahallesinde sâkin iken bundan akdem vefât eden el-Hâc Yusuf b. Abdullah b. Abdurrahman’ın verâseti zevce-i menkûha-i metrûkesi Fâtıma bt. Mehmed ile sulbî sagīr oğlu Mustafa ve sagīre kızı Havva’ya münhasıra olduğu şer‘an zâhir ve mütehakkık oldukdan sonra yine mahmiye-i mezbûrede Arabacı Bayezid mahallesinde sâkin hâfızü’l-kitâb Ahmed Ağa b. Hüseyin meclis-i şer‘de zikr olunan sagīrlerin tesviye-i umûruna kıbel-i şer‘den vasiye-i mansûbeleri ve vâlideleri ve müteveffâ-yı mezbûrun mu‘takı olup zâtı mahrûse-i Galata muzâfâtından kasaba-i Tophane’de Yazıcı mahallesinde sâkin Bostânî Mehmed Ağa b. Abdullah ve mahmiye-i mezbûrede Şeyhî mahallesinde sâkin eş-Şeyh Osman Efendi b. Abbas ta‘rîfleriyle mu‘arrefe olan Safiye bt. Abdullah mahzarında üzerine da‘vâ ve takrîr-i kelâm edip târîh-i rakīmden bir sene mukaddem mahmiye-i mezbûrede Bezzâzistân-ı atîk’de sâkin olduğu dolabda müteveffâ-yı mezbûr el-Hâc Yusuf b. Abdullah b. Abdurrahman’a hayâtında cihet-i karz-ı şer‘îden kendi malımdan iki yüz elli guruş ve bir rub‘ guruş ikrâz ve teslîm ol dahi ber-vech-i muharrer iktirâz ve tesellüm ve kabz ve kendi mesârifine sarfla istihlâk eyledikden sonra müteveffâ-yı mezbûr meblağ-ı mezbûrun yüz doksan dört guruşunu hayâtında bana def‘ u teslîm eyleyip bâkī zimmetinde altmış iki guruş ve bir rub‘ guruş hakkım kalıp meblağ-ı bâkī-i mezbûru bana kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden olup Hazret-i Eyyûbe’l-ensârî’de Başçı mahallesinde sâkin Ömer Bey b. Abdullah ve mu‘arrif-i mezbûr eş-Şeyh Osman Efendi b. Abbas li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr Ahmed Ağa târîh-i rakīmden bir sene mukaddem mahmiye-i mezbûrede Bezzâzistân-ı atîk’de sâkin olduğu dolabda müteveffâ-yı mezbûr el-Hâc Yusuf b. Abdullah b. Abdurrahman’a hayâtında cihet-i karz-ı şer‘îden bizim huzûrumuzda kendi malından olmak üzere iki yüz elli altı guruş ve bir rub‘ guruş ikrâz ve teslîm ol dahi iktirâz ve tesellüm ve kabz ve kendi mesârifine sarfla istihlâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 13 Rebî‘ülevvel sene 1110 Şuhûdü’l-hâl: Murad Efendi b. Hüseyin Ağa, Ömer Bey b. Abdullah, eş-Şeyh Mustafa Efendi, Mehmed Efendi b. Ahmed ve gayruhum.