Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 339 Hüküm no: 228 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Halil Ağa’nın kızlarına Abdullah Çelebi’nin vasi tayin edildiği Mahmiye-i İstanbul’da Camcı Ali mahallesinde olup Vilâyet-i Anadolu’da Kütahya sancağında Gediz nâm kasabada müsâfiren sâkin iken bundan akdem vefât eden Halil Ağa b. Mustafa’nın sagīre kızları Hadîce ve Ümmügülsüm’ün vakt-i rüşd ü sedâdlarına değin tesviye-i emrlerine kıbel-i şer‘den bir emîn kimesne vasî nasbı lâzım ve mühim olmağın mahalle-i mezbûre sükkânından hâfızü’l-kitâb Abdullah Çelebi b. İsmail müstakīm ve umûr-ı vesâyete kemâ-yenbağī kādir idiği lede’ş-şer‘ zâhir olmağla hâkim-i muvakkı‘-i sadr-ı kitâb tûbâ-lehû ve hüsnü-meâb efendi mezbûr Abdullah Çelebi’yi sagīretân-ı mezbûretânın vakt-i rüşd ü sedâdlarına değin tesviye-i emrlerine vasî nasb ü ta‘yîn buyurup ol dahi vesâyet-i mezbûreyi kabûl ve merâsimini edâya ta‘ahhüd etmeğin mâ-vaka‘a kayd-şüd. Fî 2 Rebî‘ülevvel sene 1110 Şuhûdü’l-hâl: Mukayyid Mustafa Efendi, Ahmed Efendi b. İsmail, Süleyman Efendi b. Şeyhzâde, İbrahim Çelebi b. Mehmed, Hüseyin Çelebi b. Ahmed, Hasan Beşe b. Abdullah.