Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 341 Hüküm no: 231 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Bostancı Yusuf Ağa’nın çocuklarına vasi ve nazır tayin edildiği Mahmiye-i İstanbul’da Mahmudpaşa kurbünde Selvi mahallesinde sâkin iken bundan akdem vefât eden Bostânî el-Hâc Yusuf Ağa b. Abdullah’ın sagīr oğlu Mustafa ve sagīre kızı Havva’nın tesviye-i umûrlarına taraf-ı şer‘-i şerîfden bir vasî nasb ü ta‘yîn olunmak lâzım ve mühim olmağın diyânet ile ma‘rûfe ve istikāmetle mevsûfe olup her vechile vesâyet uhdesinden gelmeğe kādire olduğu sikāt ihbârlarıyla lede’ş-şer‘ müte‘ayyin olan sagīrân-ı mezbûrânın vâlideleri işbu bâ‘isetü’l-kitâb Safiye Hatun bt. Abdullah’ı hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrânın vakt-i rüşd ü sedâdlarına varınca tesviye-i umûrlarına vasî ve mahalle-i Arabacı Bayezid’de sâkin Ahmed Efendi b. Hüseyin’i üzerine nâzır nasb ü ta‘yîn ettiklerinde mezbûrân Safiye Hatun ve Ahmed Efendi dahi vesâyet-i mezbûre ve nezâret-i merkūmeyi kabûl ve her biri merâsimini edâya ta‘ahhüd ve iltizâm etmeğin mâ-vaka‘a kayd-şüd. Fî 3 Rebî‘ülevvel sene 1110 Şuhûdü’l-hâl: Osman Efendi b. Abbas, Mustafa Efendi b. Mehmed, İbrahim Çelebi b. İsmail, Ömer Çelebi b. Mehmed, Hasan Bey b. Resul, el-Hâc Mehmed b. Ali, Hasan b. Abdullah, Mehmed b. Mustafa.