Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 341 Hüküm no: 232 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nalbur Mustafa’nın Fatıma Hatun Vakfı’na olan borcunun terekeden tahsil edildiği Mahmiye-i İstanbul’da el-Hâc Hasan mahallesi avâ[rı]zı’çün merhûme Fâtıma Hatun’un vakfı olan nukūda bi’l-fi‘il mütevellî olan Mahmud Çelebi b. Mehmed meclis-i şer‘-i şerîfde mahmiye-i mezbûrede Saraç İshak mahallesinde sâkin iken bundan akdem vefât eden merhûm Na‘lbur el-Hâc Mustafa b. Ahmed b. Abdurrahman’ın zevce-i metrûkesi ve evlâd-ı sıgārı Mehmed ve Kerime’nin vasiye-i mensûbeleri olmağla terekesine vâzı‘atü’l-yed olan Hadîce Hatun bt. el-Hâc Hüseyin’in hâlâ zevci ve tarafından husûs-ı âti’l-beyânda vekîl olduğu zâtı ma‘rifet-i şer‘iyye ile ârifân Ahmed Bey b. Süleyman ve Abdurrahman b. İsmail şehâdetleriyle şer‘an sâbit olan Hasan Çelebi b. Mehmed mahzarında üzerine bi’t-tevliye da‘vâ ve takrîr-i kelâm edip müteveffâ-yı mezbûr el-Hâc Mustafa b. Ahmed b. Abdurrahman zimmetinde mal-ı vakf-ı mezbûra benden mukaddem vakf-ı mezbûra mütevellî olan el-Hâc İbrahim yedinden istidâne ve kabz eylediği seksen guruş deyni olup hattâ târîh-i kitâbdan sekiz sene mukaddem ben vakf-ı mezbûra mütevellî olduğumda meblağ-ı mezbûr seksen guruşu onu on bir hesâbı üzere mezbûr el-Hâc Mustafa’nın üzerine devr-i şer‘î edip ol dahi kabûl ve meblağ-ı mezbûr cânib-i vakfa vâcibü’l-edâ zimmetinde deyni olduğunu şuhûd mahzarında ikrâr ve işhâd ettiğinden sonra kable’l-edâ vefât etmeğin yed-i vasîde olan terekesinden taleb ederim suâl olunsun dedikde gıbbe’s-suâl ve’l-inkâr mütevellî-i merkūmdan sıdk-ı makāline muvâfık beyyine taleb olundukda udûl-ı Müslimînden olup mârrü’z-zikr el-Hâc Hasan mahallesinde sâkin İbrahim Çelebi b. Ahmed ve Camcılar mahallesinde sâkin diğer İbrahim Çelebi b. el-Hâc İsmail li-ecli’ş-şehâde meclis-i şer‘a hâzırân olup istişhâd olundukda fi’l-vâki‘ müteveffâ-yı mezbûr Na‘lbur el-Hâc Mustafa b. Ahmed b. Abdurrahman hayâtında târîh-i kitâbdan sekiz sene mukaddem vech-i meşrûh üzere meblağ-ı mezbûr seksen guruş cânib-i vakf-ı mezbûra vâcibü’l-edâ zimmetinde deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mütevellî-i merkūm Mahmud Çelebi meclis-i şer‘de vekîl-i mezbûr Hasan Çelebi mahzarında ikrâr ve takrîr-i kelâm edip ânifen edâsına hükm-i şer‘î lâhık olan meblağ-ı mezbûr seksen guruşu vekîl-i mezbûr Hasan Çelebi müteveffâ-yı merkūmun terekesinden bana edâ ve teslîm ben dahi yedinden tamâmen ahz u kabz eyledim min-ba‘d müteveffâ-yı mezbûrun zimmetinde mal-ı vakf-ı mezbûrdan bir akçe ve bir habbe bâkī kalmamışdır dedikde gıbbe’t-tasdîkı’l-vicâhî mâ-vaka‘a kayd-şüd. Fî 5 Rebî‘ülevvel sene 1110 Şuhûdü’l-hâl: Yorganî el-Hâc Ahmed b. Osman, Uşşâkī Mehmed Efendi b. ( ), Mustafa Çelebi b. İbrahim, Hüseyin Çelebi b. Mehmed, el-Hâc Süleyman b. ( ) Çukadâr.