Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 352 Hüküm no: 238 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın vefat eden kocası Mehmed Efendi’den intikal eden ev hissesini oğlu Abdullah’a satıp tereke hissesini aldığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen Mevlânâ Abdurrahman Efendi b. el-müvellâ el-merhûm Ahmed Efendi irsâl olunup ol dahi mahmiye-i İstanbul’da Cevvîzâde mahallesi ahâlîsinden olup tarîk-i hacda vefât eden Mehmed Efendi b. Mustafa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Şerife Âişe bt. es-Seyyid Ömer ile sagīr oğlu Abdullah’a münhasıra ve tashîh meselesi sekiz sehmden olmağla sihâm-ı mezbûrenin bir sehmi zevcesi mezbûreye ve bâkī yedi sehmi oğlu sagīr-i mezbûra isâbet ettikden sonra zâtı mahalle-i mezbûre sükkânından Ali Efendi b. Mehmed ve Mustafa Beşe b. Receb ta‘rîfleriyle mu‘arrefe olan mezbûre Âişe meclis-i ma‘kūd-ı mezbûrda sagīr-i mezbûrun tesviye-i umûruna kıbel-i şer‘den mansûb vasîsi olan mezbûr es-Seyyid Ömer mahzarında ikrâr ve takrîr-i kelâm edip zevcim müteveffâ-yı mezbûr Mehmed Efendi’nin terekesinden mahalle-i mezbûrede vâki‘ işbu lede’l-ahâlî ve’l-cîrân ma‘lûmü’l-hudûd ve’l-müştemilât mülk menzilden tashîh-i mezbûr üzere bana isâbet eden bir sehm-i şâyi‘imi tarafeynden îcâb ve kabûlü hâvî şurût-ı müfsideden ârî bey‘-i kat‘î ile para dört hesâbı üzere on dört bin akçeye mezbûr es-Seyyid Ömer Çelebi’ye bey‘ u temlîk ve teslîm ol dahi sagīr-i mezbûr içün nef‘-i mahz olmağla iştirâ ve kabz eylediğinden sonra semeni olan meblağ-ı merkūm on dört bin akçeyi zevcim müteveffâ-yı mezbûrun terekesi tahrîr ve ba‘de ihrâci’l-mesârif ber-mûceb-i defter-i kassâm para dört hesâbı üzere bana isâbet eden altı bin üç yüz altmış beş akçeyi vasiyy-i mezbûr yedinden tamâmen alıp kabz eyledim min-ba‘d eşyâ ve menzil semenlerinden yedinde ve zimmetinde bir akçe ve bir habbe hakkım bâkī kalmadı zikr olunan bir sehm-i şâyi‘ sagīr-i mezbûrun mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan b. Abdullah ve Ahmed b. Ali ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu Fi’l-yevmi’l-ışrîn mine’l-Muharremi’l-harâm li-seneti aşer ve mi’ete ve elf. Şuhûdü’l-hâl: Ahmed b. Mehmed, Mustafa Beşe b. Mehmed, Ahmed b. Abdullah, Mehmed Çelebi b. Abdullah ve gayruhumü’l-huzzâr.