Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 359 Hüküm no: 242 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Sahaf İbrahim Efendi’nin küçük çocuklarına nafaka takdir edildiği Mahmiye-i İstanbul’da Bahçekapısı kurbünde Elvanzâde mahallesi ahâlîsinden olup bundan akdem vefât eden Sahhâf İbrahim Efendi b. Ahmed’in sagīr oğulları Abdurrahman ve Ataullah ve sagīre kızı Rukiye’nin vâlideleri ve tesviye-i emrlerine bâ-hüccet-i şer‘iyye vasiye-i muhtâreleri olup zâtı ta‘rîf-i şer‘î ile mu‘arrefe olan bâ‘isetü’l-kitâb Râbia Hatun bt. Ebubekir meclis-i şer‘-i şerîfde bi’l-vesâye ikrâr ve takrîr-i kelâm edip vasiyeleri olduğum sagīrlerin nafaka ve kisveye ihtiyâcları olmağla babaları müteveffâ-yı mezbûrdan müntakil mallarından her birine kadr-ı kifâye nafaka ve kisve-bahâ farz ve takdîr olunmak matlûbumdur dedikde vasiye-i mezbûrenin kelimât-ı meşrûhası vâkı‘a mutâbıka olmağın hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri mal-ı müntakil-i sagīrlerden târîh-i kitâbdan yevmî mezbûrân Abdurrahman ve Ataullah’dan her birine altışar sağ akçe ve sagīre-i mezbûre Rukiye’ye dörder sağ akçe nafaka ve kisve-bahâ farz ve takdîr buyurup meblağ-ı mefrûz-ı mezbûrları levâzım-ı sagīr-i mezbûrlara harc ü sarfa ve inde’z-zarûre istidâneye ve lede’z-zafer mallarına rücû‘a vasiye-i mezbûreye izin vermeğin mâ-vaka‘a bi’t-taleb ketb olundu. Fî 10 Rebî‘ülevvel sene 1110 Şuhûdü’l-hâl: Mustafa Efendi b. Abdurrahman el-İmâm, Mehmed Efendi b. Ali, Mehmed Efendi b. Mustafa, el-Hâc Osman b. Muharrem, Bayram Bey b. Mahmud, Mustafa Çelebi b. Ramazan, Berber Ali Çelebi b. Osman, Ramazan Beşe b. Enbiyâ ve gayruhum.