Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 360 Hüküm no: 243 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vefat eden kocası Sahaf İbrahim Efendi’nin kendisini vasi tayin ettiğini ispat ettiği Husûs-ı âti’l-beyânın mahallinde istimâ‘ ve tahrîri içün kıbel-i şer‘den me’zûnen irsâl olunan Mevlânâ el-Hâc Abdurrahman Efendi b. Mustafa mahmiye-i İstanbul’da Bahçekapısı kurbünde Elvanzâde mahallesinde sâkin iken bundan akdem vefât eden Sahhâf İbrahim Efendi b. Ahmed’in menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf ettikde müteveffâ-yı mezbûrun vech-i âtî üzere vesâyetini tenfîze vasiyy-i muhtâresi olduğunu iddi‘â edip zâtı mahalle-i mezbûre ahâlîsinden Mehmed Efendi b. Mustafa ve Mustafa Çelebi b. Ramazan ta‘rîfleriyle mu‘arrefe olan müteveffânın zevce-i menkûha-i metrûkesi bâ‘isetü’l-kitâb Râbia Hatun bt. Ebubekir meclis-i ma‘kūd-ı mezkûrda müteveffâ-yı mezbûrun evlâd-ı sıgārının tesviye-i emrlerine tashîhan li’d-da‘vâ kıbel-i şer‘den vasî nasb olunan mahalle-i mezbûrede sâkin Bayram Bey b. Mahmud mahzarında üzerine da‘vâ ve takrîr-i kelâm edip müteveffâ-yı mezbûr hâl-i marazında fevtinden on beş gün mukaddem bi-emrillâhi te‘âlâ fevt olduğumda cemî‘ terekemi ahz u kabz ve semen-i misilleriyle bey‘ ve kabz-ı semen ve semenlerinden evvelâ vech-i mesnûn üzere yirmi guruşla levâzım-ı techîz ve tekfînim görüle ve iskāt-ı salât ve eyyâm-ı mübârekede tabh-ı ta‘âm ve it‘âm-ı fukarâ [ve] sulehâ oluna ve düyûn-ı müsbetem kazâ oluna ve ba‘de kazâi’d-düyûn bâkī malımın sülüsünden elli guruş ifrâz olunup meblağ-ı mezbûr ile menâsik-i hacc-ı şerîfe âlim-i hâccü’l-haremeyn bir kimesneye verilip benim içün hacc-ı şerîf ettirile deyü huzûr-ı Müslimînde vasiyet edip tenfîzine ve sagīr oğulları Abdurrahman ve Ataullah ve sagīre kızı Rukiye’nin mal-ı menkūllerini zabt u hıfza ve vakt-i rüşd ü sedâdlarına varınca tesviye-i emrlerine beni vasiye-i muhtâre nasb ü ta‘yîn edip ben dahi muvâcehesinde kabûl ve musırran-aleyhâ fevt oldukda tenfîz-i vesâyâ murâd ettiğimde mezbûr Bayram Bey mâni‘ olur suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden mu‘arrifân-ı mezbûrân Mehmed Efendi b. Mustafa ve Mustafa Çelebi b. Ramazan ve Hüseyin Beşe b. Receb li-ecli’ş-şehâde meclis-i ma‘kūd-ı mezbûra hâzırûn olup istişhâd olunduklarında fi’l-hakīka müteveffâ-yı mezbûr Sahhâf İbrahim Efendi b. Ahmed b. Abdullah hâl-i marazında fevtinden on beş gün mukaddem bi-emrillâhi te‘âlâ fevt olduğumda cemî‘ terekemi ahz u kabz ve semen-i misilleriyle bey‘ ve kabz-ı semen ve semenlerinden yirmi guruş ile evvelâ vech-i mesnûn üzere levâzım-ı techîz ve tekfînim görüle ve eyyâm-ı mübârekede tabh-ı ta‘âm ve it‘âm-ı sulehâ ve fukarâ oluna ve düyûn-ı müsbetem kazâ oluna ve ba‘de kazâi’d-düyûn bâkī malımın sülüsünden elli guruş ifrâz olunup meblağ-ı mezbûr ile menâsik-i hacc-ı şerîfe âlim-i hâccü’l-haremeyn bir sâlih kimesneye verilip benim içün hacc-ı şerîf ettirile deyü vasiyet edip tenfîzine ve sagīr oğullarına ve sagīre kızı Rukiye’nin mal-ı menkūllerini zabt u hıfza ve vakt-i rüşd ü sedâdlarına varınca tesviye-i emrlerine zevcesi işbu müdde‘iye-i mezbûre Râbia Hatun bt. Ebubekir’i huzûrumuzda vasiye-i muhtâre ve üzerine mahalle-i mezbûrede sâkin Bayram b. Mahmud’u ve Mehmed Efendi b. Ali ve Mehmed Efendi b. Mustafa’yı hasbî nâzır nasb ü ta‘yîn ettikde onlar dahi vesâyet ve nezâreti kabûl ve musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı [mezbûr] mahallinde tahrîr ba‘dehû ma‘an mürsel Hüseyin Çelebi b. Mehmed ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 9 Rebî‘ülevvel sene 1110 Şuhûdü’l-hâl: Mustafa Efendi b. Abdurrahman, el-Hâc Osman b. Muharrem, Berber Ali Çelebi b. Osman, Ramazan b. Nebi ve gayruhum.