Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 364 Hüküm no: 249 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris İbrahim Efendi’nin vefat eden Abdurrahman Ağa’da alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın cânib-i şerî‘at-i garrâdan ba‘s olunan Mevlânâ Mehmed Efendi b. Mahmud mahmiye-i İstanbul’da el-Hâc Evliyâ mahallesinde sâkine Sarayî Hadîce Hatun bt. Abdullah b. Abdullah’ın menziline varıp zeyl-i vesîkada isimleri mastûr Müslimîn huzûrlarında akd-i meclis-i şer‘-i âlî ettikde mahmiye-i mezbûrede Aksaray kurbünde Alembey mahallesinde sâkin umdetü’l-müderrisîni’l-kirâm ve zübdetü’l-muhakkıkīni’l-fihâm sâhib-i hâze’l-kitâb İbrahim Efendi b. el-merhûm Mustafa Paşa b. ( ) tarafından husûs-ı âti’l-beyânda vekîl olduğu etbâ‘ından Eyüb Efendi b. Mustafa ve Mehmed Çelebi b. Mehmed şehâdetleriyle sâbit ve sübût-ı vekâletine hükmolunan yine etbâ‘ından İsmail Çelebi b. İbrahim meclis-i ma‘kūd-ı mezkûrda mezbûre Hadîce Hatun’un zevci ve devletlü sa‘âdetlü Beyhan Sultan -dâmet ismetuhâ ve istakarret azametühâ- hazretlerinin kethüdâları iken bundan akdem vefât eden Abdurrahman Ağa b. Şa‘bân b. Abdullah’ın evlâd-ı sıgārı Ahmed ve Âişe ve Fâtıma’nın tesviye-i emrlerine kıbel-i şer‘-i enverden mansûb vasîleri olmağla terekesine vaz‘-ı yed eden Ali Efendi b. Ahmed ile mezbûre Hadîce Hatun tarafından husûs-ı âti’z-zikrde husûmet ve redd-i cevâba müseccel vekîli olan el-Hâc Hüseyin b. Ebubekir mahzarlarında bi’l-vekâle üzerlerine da‘vâ ve takrîr-i kelâm edip müteveffâ-yı mezbûr Abdurrahman Ağa b. Şa‘bân b. Abdullah zimmetinde işbu imzâ ve hatmiyle mümzâ ve mahtûm ve bin yüz üç senesi Cumâdelâhiresi’nin evâsıtı târîhiyle müverrah deyn temessüğü nâtık olduğu üzere cihet-i karzdan müvekkilim müşârün-ileyh İbrahim Efendi’nin yüz kıt‘a aynî esedî guruş hakkı olup hattâ meblağ-ı merkūm cihet-i mezkûreden zimmetinde müvekkilim müşârün-ileyhe cihet-i mezbûreden edâsı lâzım deyni olduğunu hâl-i kemâl-i sıhhatinde alâ-ruûsi’l-istişhâd ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan müdde‘âsına beyyine taleb olundukda udûl-ı Müslimînden zikr olunan Alembey mahallesi sâkinlerinden Süleyman Efendi b. Mehmed ve es-Seyyid Mustafa Çelebi b. es-Seyyid Şa‘bân li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-vâki‘ müteveffâ-yı mezbûr hâl-i kemâl-i sıhhatinde müvekkil-i müşârün-ileyh İbrahim Efendi’ye cihet-i mezbûreden zimmetinde edâsı lâzım yüz kıt‘a esedî guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemînü’l-müvekkili’l-müşârün-ileyh mûcebiyle ba‘de’l-hükm <> vâki‘ hâli mevlânâ-yı mezbûr mahallinde tahrîr ma‘an ba‘s olunan Çukadâr Nasuh Beşe ve Hasan Çelebi b. Abdullah ile meclis-i şer‘a gelip alâ-vukū‘ihi. Fi’l-yevmi’l-hâdî aşer [min] Rebî‘ülevvel sene 1110 Şuhûdü’l-hâl: Salih Efendi b. Ahmed, İbrahim Çavuş b. ( ), İbrahim Halîfe b. Edhem, Haffâf Ahmed Çelebi b. Mehmed, Ramazan Çelebi b. Ömer.