Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 370 Hüküm no: 253 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Halime Hatun’un küçük çocuklarına nafak takdir edildiği Mahmiye-i İstanbul’da Serv[i]? mahallesinde sâkine iken bundan akdem vefât eden Halime Hatun bt. Abdullah’ın sagīr oğulları Mehmed ve Süleyman’ın babaları ve tesviye-i umûrlarına kıbel-i şer‘den mansûb vasîleri olan hâfızü’l-kitâb Mustafa Çelebi b. Mehmed meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip vasîleri olduğum sagīrân-ı mezbûrân içün vâlideleri müteveffât-ı mezbûreden müntakil mal-ı mevrûslarından kadr-ı kifâye nafaka ve kisve-bahâ farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i vesîkada muharrerü’l-esâmî Müslimîn haberleriyle mütehakkık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrân için mal-ı müntakillerinden târîh-i kitâbdan her birine beher yevm altışar akçe-i sağ olmak üzere nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrân-ı mezbûrânın nafaka ve kisve ve sâir levâzımlarına harc ü sarfa ve vakt-i zarûretde istidâneye ve lede’z-zafer mallarına rücû‘a vasiyy-i mezbûra izin birle mâ-vaka‘a bi’t-taleb ketb olundu. Fi’l-yevmi’l-ışrîn min-şehri Rebî‘ülevvel sene 1110 Şuhûdü’l-hâl: Mehmed Ağa b. Ahmed Bostânî, Kavukçu el-Hâc Selim b. Hacı Ali, Kavukçu Hacı Mustafa b. Ali, Mehmed Çelebi b. Hacı Mehmed, Çukadâr Nasuh Beşe ve gayruhum.