Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 371 Hüküm no: 254 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Halime Hatun’un küçük çocuklarına babaları Mustafa Çelebi’nin vasi tayin edildiği Mahmiye-i İstanbul’da Serv[i](?) mahallesinde sâkine iken bundan akdem vefât eden Halime Hatun bt. Abdullah’ın sadrî sagīr oğulları Mehmed ve Süleyman’a vâlideleri müteveffât-ı mezbûreden müntakil mallarını hıfz ve ahvâllerin zabta ve tesviye-i umûrlarına bir vasî nasbı lâzım olmağın diyânet ile ma‘rûf ve istikāmet ile mevsûf ve perhizkâr ve melî olup her vechile vesâyet uhdesinden gelmeğe kādir olduğu zeyl-i kitâbda muharrerü’l-esâmî Müslimîn ihbârlarıyla zâhir olan babaları hâfızü’l-kitâb Mustafa Çelebi b. Mehmed’i hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri vech-i muharrer üzere sagīrân-ı mezbûrânın tesviye-i umûrlarına kıbel-i şer‘den vasî nasb ü ta‘yîn buyurduklarında ol dahi vesâyet-i mezbûreyi kabûl ve merâsimini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-şehri Rebî‘ülevvel sene 1110 Şuhûdü’l-hâl: Es-sâbikūn.