Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 375 Hüküm no: 261 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Ferruh’un hür olduğunu ispat ettiği Müteveffât-ı âti’z-zikre rıkkı sâbıkı[nı] mu‘terife işbu açık kaşlı gök elâ gözlü orta boylu Rusiyyetü’l-asl hâfızatü’l-kitâb Ferruh bt. Abdullah meclis-i şer‘-i hatîr-ı lâzımü’t-tevkīrde mahmiye-i İstanbul’da Veled-i Karabaş mahallesinde sâkin iken bundan akdem vefât eden Safiye Hatun bt. Mustafa’nın tesviye-i umûruna vasiyy-i muhtârı olmağla terekesine vaz‘-ı yed eden el-Hâc Süleyman b. Abdülmennan mahzarında üzerine da‘vâ ve takrîr-i kelâm edip seyyidem müteveffât-ı mezbûre Safiye Hatun bt. Mustafa hayâtında târîh-i kitâbdan bir sene mukaddem beni huzûr-ı Müslimînde mülkünde olduğum hâlde tedbîr-i mutlak ile müdebbere edip fevt oldukda terekesinin sülüsü fetâ kıymetimin sülüsânı olan altmış guruşa müsâ‘id olmağla ben hürre olmuş iken vasiyy-i mezbûrdan olup terekeden olmak üzere bana bi-gayr-ı hakkın vaz‘-ı yed eder suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden Ahmed Efendi b. Hüseyin ve el-Hâc Mustafa b. Halil li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffât-ı mezbûre Safiye Hatun bt. Mustafa hayâtında târîh-i kitâbdan bir sene mukaddem mevsûfe-i mezbûre Ferruh’u mülkünde olduğu hâlde huzûrumuzda tedbîr-i mutlak ile müdebbere edip fevt oldukda terekesinin sülüsü fetâ kıymetimin sülüsânı olan altmış guruşa müsâ‘id olmağla hâlâ mevsûfe-i mezbûre hürre olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Saferi’l-hayr sene 1110 Şuhûdü’l-hâl: Mehmed Efendi b. Hasan el-İmâm, İbrahim Çelebi b. Ramazan, Mustafa Çelebi b. İbrahim, Abdullah Çelebi b. Yunus, el-Hâc Mehmed b. Halil, İbrahim Çelebi b. Mehmed, Hasan Çelebi b. Abdullah ve gayruhum.