Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 375 Hüküm no: 260 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Kadri Beşe’nin Kırk Üçüncü Yeniçeri Cemaati Odası Para Vakfı’na olan borcunun terekesinden ödenmesi Dergâh-ı âlî yeniçerilerinin kırk üçüncü cemâ‘at odasının nukūd-ı mevkūfesinde hâlâ bi’l-fi‘il mütevellî olan bâ‘isü’l-kitâb Cafer Beşe b. Abdurrahman mahfil-i kazâda mahmiye-i İstanbul’da Aydın Kethüdâ mahallesinde sâkin iken bundan akdem vefât eden Kadri Beşe b. Ahmed’in zevce-i metrûkesi ve terekesine bi’l-verâse vâzı‘atü’l-yed olup zâtı zevci Hasan Beşe b. Abdullah ve Hasan Çelebi b. Abdurrahman ta‘rîfleriyle mu‘arrefe olan Âişe Hatun bt. Ahmed mahzarında üzerine da‘vâ ve takrîr-i kelâm edip müteveffâ-yı mezbûr Kadri Beşe b. Ahmed b. Ahmed bin yüz dokuz senesi Rebî‘ülevveli gurresinde işbu yedinde olan mu‘anven ve mersûm deyn temessüğü nâtık olduğu üzere mal-ı vakf-ı mezbûrdan doksan beş guruş idâne ve teslîm ol dahi istidâne ve kabz edip hattâ meblağ-ı mezbûr cihet-i mezbûreden zimmetinde cânib-i vakfa edâsı lâzım deyni olduğunu târîh-i mezbûrda huzûr-ı Müslimînde ikrâr ve işhâd dahi edip kable’l-edâ fevt olmağın terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden mahmiye-i mezbûrede Şah Sultan mahallesinde sâkin Hüseyin Beşe b. Mustafa ve yirmi dokuzuncu cemâ‘at odası yoldaşlarından Şa‘bân Beşe b. Ali li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr bin yüz dokuz senesi Rebî‘ülevveli’nde cânib-i vakf-ı mezbûra cihet-i mezbûreden doksan beş guruş zimmetimde edâsı lâzım deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm kayd-şüd. Fî 20 Rebî‘ülevvel sene 1110 Şuhûdü’l-hâl: es-Seyyid Mustafa Efendi, Mukayyid Mustafa Efendi, Abdurrahman Efendi b. Ahmed Efendi, Hüseyin Çelebi b. Mehmed, Ahmed Çelebi b. Süleyman.