Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 376 Hüküm no: 263 Orijinal metin no: [69a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Rukiye Hatun’un mirasçılarından eşi Ahmed ile validesi Fatıma Hatun’un alacak-verecek hususunda zimmetlerini ibra ettikleri Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden me’zûnen irsâl olunan Mevlânâ Hâfız Mehmed Efendi b. eş-Şeyh Mustafa mahmiye-i İstanbul’da Emin Nureddin mahallesinde sâkine iken bundan akdem vefât eden Rukiye Hatun bt. Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i mübîn ettikde müteveffât-ı mezbûrenin verâseti zevc-i metrûku el-Hâc Ahmed b. Mehmed ile vâlidesi Fâtıma Hatun bt. Mehmed’e ve li-ebeveyn karındaşları İshak Çelebi ve Mustafa Çelebi’ye münhasıra ve tashîh meselesi altı sehmden olmağla sihâm-ı mezbûrenin üç sehmi zevci mezbûr el-Hâc Ahmed’e ve bir sehmi vâlidesi mezbûre Fâtıma Hatun’a ve bâkī iki sehmin birer sehmi mezbûrân İshak Çelebi ve Mustafa Çelebi’den her birine isâbeti tahakkukundan sonra zâtı mahalle-i mezbûre sükkânından Hasan Çelebi b. Ahmed ve Mehmed Çelebi b. Ali ta‘rîfleriyle mu‘arrefe olan hâfızatü’l-kitâb mezbûre Fâtıma Hatun meclis-i ma‘kūd-ı mezbûrda mezbûr el-Hâc Ahmed mahzarında ikrâr ve takrîr-i kelâm edip kızım müteveffât-ı mezbûrenin benim zimmetimde elli yedi guruş hakkı olup benim dahi gāib ani’l-meclis İbrahim Çelebi zimmetinde cihet-i deyn-i şer‘îden olan elli guruş hakkıma mezbûr el-Hâc Ahmed kefîl olmağla meblağ-ı merkūm elli guruşu bana vermek üzere gāib-i mezbûr İbrahim Çelebi’den merkūm el-Hâc Ahmed ahz u kabz edip bana vermemekle zimmetinde kalmışidi el-hâletü hâzihi meblağ-ı merkūm elli guruşun yirmi sekiz buçuk guruşunu benim zimmetinde olan meblağ-ı merkūm elli yedi guruşdan [69b] tashîh-i mezbûr üzere mezbûr el-Hâc Ahmed’in hissesine isâbet eden yirmi sekiz buçuk guruşa takas ol dahi mukāssa ve kabûl edip hakkımdan meblağ-ı bâkī yirmi bir buçuk guruş da‘vâsından mezbûr el-Hâc Ahmed’in zimmetini ibrâ-i âm ile ibrâ ve iskāt eyledim ol dahi tereke-i müteveffât-ı mezbûreden hissesine müte‘allıka âmme-i da‘vâdan benim zimmetimi ibrâ-i âmm-ı katı‘u’l-hısâm ile ibrâ ve iskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr edip ba‘dehû ma‘an ba‘s olunan Mehmed b. Hüseyin ve Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevm 15 [min-Rebî‘ülevvel] sene 1110 Şuhûdü’l-hâl: eş-Şeyh Ahmed Efendi b. Hamza, el-Hâc Ali b. Abdullah, Ali Odabaşı b. Halil, Bektaş Bey b. Mustafa, Hüseyin Çelebi b. Derviş, Halil Çelebi b. Abdullah, Yusuf Bey b. Abdullah, Abdullah Çelebi b. Ali, Ali Çelebi b. Mahmud.