Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 377 Hüküm no: 264 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emetullah Hatun’un kızı Hanife’ye Keçeci Mehmed’in vasi tayin edildiği Mahmiye-i İstanbul’da Sultan Selim kurbünde Koğacıdede mahallesinde Osman Paşa odalarının birinde sâkine iken bundan akdem vefât eden Emetullah Hatun bt. Mehmed’in sagīre kızı Hanife’nin tesviye-i umûruna kıbel-i şer‘-i enverden bir vasî nasb ü ta‘yîn olunmak lâzım ve mühim olmağın emânet ve diyânet ile ma‘rûf ve mevsûf olup vesâyete her vechile ehil ve mahmûdü’l-hâl olduğu zeyl-i kitâbda muharrerü’l-esâmî Müslimîn haberleriyle lede’ş-şer‘i’ş-şerîf zâhir olan mahmiye-i mezbûrede Manisalı Çelebi mahallesinde sâkin işbu hâfızü’l-kitâb Keçeci el-Hâc Mehmed b. Osman’ı hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri tesviye-i umûr-ı sagīre-i mezbûreye vakt-i rüşd ü sedâdına varınca vasî nasb ü ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini kemâ-yenbağī edâya müte‘ahhid olmağın mâ hüve’l-vâki‘ bi’t-taleb ketb olundu. Fî 28 min-Saferi’l-hayr sene 1110 Şuhûdü’l-hâl: Mehmed Efendi b. Mustafa, Saraç Hüseyin Çelebi b. Osman, Ali Çelebi b. Mehmed, Süleyman Çelebi b. Mehmed, el-Hâc Hüseyin b. Abdullah, Ali Bey b. Mehmed.