Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 378 Hüküm no: 265 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vefat eden kızı Fatıma Hatun’un terekesindeki hissesi ile gömlek bedelinden olan alacağını damadı Ali Beşe’den sulh yoluyla aldığı Husûs-ı âti’l-beyânın mahallinde ketb ü tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ Velizâde Mehmed Efendi mahmiye-i İstanbul’da Yenibahçe kurbünde Kırkodalar denmekle ma‘rûf müteehhilîn odalarının birinde sâkine <> Hadîce Hatun bt. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde menzil-i mezbûrda sâkine iken bundan akdem vefât eden Fâtıma Hatun bt. Mehmed’in verâseti zevc-i metrûku Ali Beşe b. Mustafa ile vâlidesi mezbûre Hadîce Hatun’a ve sagīre kızları Âişe ve Hadîce ile Mısr-ı Kāhire’de sâkin kebîr oğlu Mustafa Çelebi’ye münhasıra olup kable’l-kısme sagīre-i mezbûre Hadîce dahi fevt olup verâseti cedde-i sahîhası mezbûre Hadîce Hatun ile babası mezbûr Ali Beşe’ye münhasıra olup tashîh-i meselesi bi-hükmi’l-münâsahati iki yüz seksen sekiz sehmden olmağla sihâm-ı mezbûrenin yüz yedi sehmi iki mertebede mezbûr Ali Beşe’ye ve elli beş sehmi dahi iki mertebede mezbûre Hadîce’ye ve kırk iki sehmi bir mertebede sagīre-i mezbûre Âişe’ye ve seksen dört sehmi kezâlik bir mertebede mezbûr Mustafa Çelebi’ye isâbeti tahakkukundan sonra zâtı zevci Ahmed Beşe b. Dilaver ve Mustafa Çelebi b. Hasan Efendi ta‘rîfleriyle mu‘arrefe olan mezbûre Hadîce Hatun meclis-i ma‘kūd-ı mezkûrda müteveffât-ı mezbûre Fâtıma’nın zevci ve sagīre kızı mezbûre Âişe’nin tesviye-i umûruna ve mezbûr Mustafa Çelebi’nin hisse-i irsiyesini zabt u hıfza kıbel-i şer‘-i enverden hüccet-i şer‘iyye ile vasiyy-i mansûbları olmağla terekesine verâseten ve vesâyeten vaz‘-ı yed eden işbu hâfızü’l-kitâb mezbûr Ali Beşe mahzarında ikrâr ve takrîr-i kelâm edip kızım müteveffât-ı mezbûrenin terekesi tahrîr ve ba‘de ihrâci’l-mesârif defter-i kassâm-ı askerî nâtık olduğu üzere tereke-i mebî‘asından ve zevci mezbûr Ali Beşe zimmetinde olan mehrinden tashîh-i mezbûr üzere münâsahaten bana isâbet eden para üç akçe hesâbınca iki bin sekiz yüz beş akçe hisse-i irsiyemi terekeden olmak üzere mezbûr Ali Beşe yedinden bi’t-tamâm ahz u kabz eyledim min-ba‘d meblağ-ı mezbûrdan yedinde bir şey kalmadı dedikde gıbbe’t-tasdîk mezbûre Hadîce Hatun yine meclis-i ma‘kūd-ı mezbûrda mezbûr Ali Beşe mahzarında ikrâr ve takrîr-i kelâm edip benim mezbûr Ali Beşe zimmetinde beş aded gömlek semeninden on guruş hakkım vardır deyü da‘vâ ettiğimde ol dahi inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihi beynimize muslihûn tavassut edip beni mezbûr Ali Beşe ile nakd iki guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedeli olan iki guruşu mezbûr Ali Beşe yedinden ahz u kabz eyledim ba‘de’l-yevm dâhil-i defter ve hâric ez defter kalîl ü kesîr ve celîl ü hakīr terekeden mîrâs da‘vâsına müte‘allık âmme-i da‘vâdan mezbûr Ali Beşe’nin zimmetini ibrâ-i âmm-ı katı‘u’n-nizâ‘ ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ve Mustafa b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a ketb-şüd. Fî 28 min-Saferi’l-hayr sene 1110 Şuhûdü’l-hâl: Fahrü’l-kuzât Mehmed Efendi b. Hasan Efendi, Mustafa Çelebi birâder-i mezbûr, Ahmed Beşe b. Dilaver, Mehmed Çelebi b. el-Hâc Ali.