Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 390 Hüküm no: 273 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın vefat eden Fatıma Hatun’da alacağı olduğunu ispat ettiği Kezâlik meclis-i ma‘kūd-ı mezbûrda akd-i meclis ettikde mahmiye-i İstanbul’da Canbâziye mahallesinde sâkin bâ‘isü’l-kitâb İbrahim Ağa b. İsmail meclis-i mezbûrda müteveffât-ı mezbûrenin vasiyy-i muhtârı Hasan Ağa b. Mustafa mahzarında üzerine da‘vâ ve takrîr-i kelâm edip müteveffât-ı mezbûreye târîh-i kitâbdan bir buçuk sene mukaddem malımdan yüz otuz guruş ikrâz ve teslîm ol dahi yedimden iktirâz ve tesellüm ve kabz u kabûl ve mukābelesinde silk-i mülkünde münselik işbu meclisde mu‘âyene olunan on dokuz miskāl bir çift altın bilezik ve iki sagīr elmaslı hâtem ve iki yafta inci kuşak ve üçer ayaklı bir çift la‘l küpe ve bir sîm buhûrdân ve kılâbdân ve bir sîm maşraba ve bir sîm ayna ve iki yaftalı sîm kuşak ve bir la‘l hâtemini bana rehin vaz‘ ve teslîm ben dahi irtihân ve tesellüm ve kabz ettikden sonra meblağ-ı mezbûru kendi mesârifine sarfla istihlâk edip cihet-i mezbûreden vâcibü’l-edâ bana deyni olduğunu huzûr-ı Müslimînde ikrâr ve işhâd edip kable’l-edâ ve’l-fek fevt olmağla terekesinden taleb ederim suâl olunsun dedikde gıbbe’s-suâl mezbûr Hasan Ağa cevâbında terekeye vech-i muharrer üzere vaz‘-ı yedini ikrâr ve deyn-i mezkûru inkâr edicek müdde‘î-i mezbûrdan sıdk-ı makāline beyyine taleb olundukda şâhidân-ı mezbûrân li-ecli’ş-şehâde meclis-i ma‘kūda hâzırân olup istişhâd olundukda fi’l-hakīka târîh-i mezbûrda yüz otuz guruş vech-i muharrer üzere ikrâz eyleyip rihân-ı mezbûrdan kable’l-fek fevt oldu biz bu husûsa bu vech üzere şâhidleriz şehâdet dahi kezâlik vâki‘ hâli kezâlik inhâ etmeğin kayd-şüd. Fi’t-târîhi’l-mezbûr. Şuhûdü’l-hâl: Eş-şâhidûnü’s-sâbikūn.