Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 395 Hüküm no: 279 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Rahime’nin hür olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Ahmed Efendi b. el-merhûm İsmail Efendi mahmiye-i İstanbul’da el-Hâc Hasan mahallesinde sâkin iken bundan akdem vefât eden Attâr el-Hâc Mustafa b. Mahmud b. Hasan’ın menziline varıp zeyl-i kitâbda muharrerü’l-Müslimîn huzûrlarında akd-i meclis-i şer‘-i şerîf ettikde müteveffâ-yı mezbûra rıkk-ı sâbıkını mu‘terife işbu orta boylu açık kaşlı sarı elâ gözlü Rusiyyetü’l-asl Müslimetü’l-mille bâ‘isetü’l-kitâb Rahime bt. Abdullah meclis-i ma‘kūd-ı mezbûrda müteveffâ-yı mezbûrun evlâd-ı sıgārı Hadîce ve Emine ve Safiye’nin tesviye-i emrlerine kıbel-i şer‘den vasî nasb olunmağla tereke-i müteveffâ-yı mezbûra vaz‘-ı yed eden İbrahim Çelebi b. Mustafa mahzarında üzerine da‘vâ ve takrîr-i kelâm edip seyyidim müteveffâ-yı mezbûr hayâtında târîh-i fevtinden altı ay mukaddem câriye-i memlûkesi olduğum hâlde beni huzûr-ı Müslimînde hasbeten lillâh malından tahrîr ve i‘tâk edip ben sâir harâir-i asliyât gibi hürre olmuş iken vasiyy-i mezbûr bana rıkka olup terekeden olmak üzere bi-gayr-ı hakkın vaz‘-ı yed eder suâl olunup üzerimden kasr-ı yedine tenbîh olunmak matlûbumdur dedikde gıbbe’s-suâl vasiyy-i mezbûr cevâbında müdde‘iye-i mevsûfe-i mezbûreye vaz‘-ı yedini ikrâr lâkin vech-i meşrûh üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı Müslimînden mahmiye-i mezbûrede Hoca Ali mahallesinde sâkin İsmail Çelebi b. Ömer ve sâir Tophane’de zikr olunan el-Hâc Hasan mahallesinde sâkine müteveffâ-yı mezbûrun akrabâsından Emine Hatun bt. Ahmed ve Safiye Hatun bt. İbrahim li-ecli’ş-şehâde meclis-i ma‘kūd-ı mezbûra hâzırûn olup istişhâd olunduklarında fi’l-hakīka müteveffâ-yı mezbûr el-Hâc Mustafa b. Mahmud b. Hasan hayâtında târîh-i fevtinden altı [ay] mukaddem memlûke câriyesi olduğu hâlde işbu müdde‘iye-i mevsûfe-i mezbûre Rahime bt. Abdullah’ı huzûrumuzda hasbeten lillâh malından tahrîr ve i‘tâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr el-Hâc Abdullah b. Mehmed ve Hasan Çelebi b. Abdullah ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 5 min-Safer sene 1110 Şuhûdü’l-hâl: Ömer Ağa b. Hüsameddin, Osman Ağa b. Mehmed, el-Hâc Abdülkerim b. Cafer, Hasan Çelebi b. Hüseyin, Mehmed Çelebi b. Hızır, Süleyman Çelebi b. Abdullah.