Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 396 Hüküm no: 280 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Bostancı Hasan Bey’in kızlarına nafaka takdir edildiği Mahmiye-i İstanbul’da Bahçekapısı kurbünde Hobyar mahallesi ahâlîsinden olup bundan akdem Vilâyet-i Rumeli’nde Drama zâbiti iken müsâfiren vefât eden Bostânî mütekā‘idlerinden Hasan Bey b. Abdullah’ın evlâd-ı sıgārı Hanife ve Fâtıma ve Âişe’nin vâlideleri ve tesviye-i emrlerine kıbel-i şer‘-i enverden vasiye-i mansûbeleri olup zâtı mahalle-i mezbûre ahâlîsinden olup Halil Efendi b. Ahmed ve Mustafa Bey b. Ömer ta‘rîfleriyle mu‘arrefe olan müteveffâ-yı mezbûrun zevce-i menkûha-i metrûkesi işbu hâfızatü’l-kitâb Hadîce Hatun bt. Abdullah meclis-i şer‘-i şerîf-i lâzımü’t-tevkīrde bi’l-vesâye takrîr-i kelâm edip vasiyeleri olduğum kızlarım sagīre-i mezbûrelerin nafaka ve kisveye ihtiyâcları olmağla babaları müteveffâ-yı mezbûrdan intikāl eden mallarından her birine kadr-ı kifâye nafaka ve kisve-bahâ farz ve takdîr olunmak matlûbumdur dedikde vasiye-i mezbûrenin kelimât-ı meşrûhası vâkı‘a mutâbıka olmağın hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri mal-ı sagīre-i mezbûrelerden târîh-i kitâbdan her birine yevmî yirmişer sağ akçe nafaka ve kisve-bahâ farz ve takdîr buyurup meblağ-ı mefrûz-ı mezbûrları levâzım-ı sagīre-i mezbûrelere harc ü sarfa ve inde’z-zarûre istidâneye ve lede’z-zafer mallarına rücû‘a mezbûre Hadîce’ye izin vermeğin mâ-vaka‘a bi’t-taleb ketb olundu. Fî gurre-i Saferi’l-hayr sene 1110 Şuhûdü’l-hâl: Yazıcı İbrahim Efendi b. Hüseyin, İsmail Bey b. İbrahim Terekeci, Ali Hoca b. Ahmed, İbrahim Çelebi b. Mustafa, Mehmed Bey b. Mustafa, Çukadâr Mehmed Bey ve gayruhum.