Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 397 Hüküm no: 282 Orijinal metin no: [72b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vefat eden kocası Hasan Bey’de olan mehir bedeliyle miras hissesini terekeden alıp zimmetini ibra ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ el-Hâc Abdurrahman Efendi b. Mustafa mahmiye-i İstanbul’da Bahçekapısı kurbünde Hobyar mahallesi ahâlîsinden olup bundan akdem Vilâyet-i Rumeli’nde Drama zâbiti iken vefât eden Bostânî mütekā‘idlerinden Hasan Bey b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı mahalle-i mezbûre ahâlîsinden Halil Efendi b. Ahmed ve Mustafa Bey b. Ömer ta‘rîfleriyle mu‘arrefe olan hâfızatü’l-kitâb Hadîce Hatun bt. Abdullah meclis-i ma‘kūd-ı mezkûrda tereke-i müteveffâ-yı mezbûra bi’l-verâse vaz‘-ı yed eden zâtı mu‘arrifân-ı mezbûrân ta‘rîfleriyle mu‘arrefe olan âhar zevcesi Emine Hatun bt. Abdullah mahzarında üzerine da‘vâ ve takrîr-i kelâm edip mezbûr Hasan Bey b. Abdullah b. Abdullah b. Abdullah [73a] târîh-i fevtinden dört sene mukaddem tezevvüc murâd ettikde beni şuhûd mahzarlarında altı bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl mezbûre Emine Hatun cevâbında terekesine vech-i muharrer üzere vaz‘-ı yedini ikrâr ve müdde‘iye-i mezbûrenin vech-i meşrûh üzere müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı Müslimînden mahalle-i mezbûre ahâlîsinden mu‘arrifân-ı mezbûrân Halil Efendi b. Ahmed ve Mustafa Bey b. Ömer li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka mezbûr Hasan Bey b. Abdullah b. Abdullah târîh-i fevtinden dört sene mukaddem tezevvüc murâd ettikde mezbûre Hadîce Hatun bt. Abdullah’ı huzûrumuzda altı bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynlerinde bu vechile kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm müdde‘iye-i mezbûre Hadîce Hatun meclis-i ma‘kūd-ı mezbûrda mezbûre Emine Hatun mahzarında bi-tav‘ihâ ikrâr ve takrîr-i kelâm edip zevcim müteveffâ-yı mezbûr zimmetinde olup ânifen edâsına hükm-i şer‘î lâhık olan altı bin sağ akçe mehr-i müeccel-i müsbet hakkımı ve ba‘de ihrâci’l-mesârif ve’d-düyûn ve’s-sülüs ber-mûceb-i defter-i kassâm-ı askerî nısf-ı sümün hisseme isâbet eden para dört hesâbı üzere otuz bin altı yüz yirmi altı akçe hakkımı terekeden olmak üzere mezbûre Emine Hatun yedinden tamâmen ahz u kabz eyledim meblağayn-ı mezbûreynden mezbûre Emine yedinde ve zimmetinde bir akçe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilhicceti’ş-şerîfe sene 1110 Şuhûdü’l-hâl: Yazıcı İbrahim Efendi b. Hasan, İsmail Bey b. İbrahim, Ali Hoca b. Ahmed, İbrahim b. Mustafa, Çukadâr Mehmed Bey, İbrahim Beşe b. Mehmed, Abdülaziz b. Abdürrezzak ve gayruhum.