Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 403 Hüküm no: 289 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Ayşe’nin hür olduğunu ispat ettiği Kezâlik akd-i meclis-i şer‘-i şerîf ettikde bundan akdem vefât eden el-Hâc Mehmed b. el-Hâc Hamuda’nın menziline varıp zeyl-i vesîkada muharrerü’l-esâmî Müslimîn huzûrunda müteveffâ-yı mezbûra rıkk-ı sâbıkını mu‘terife işbu açık kaşlı kara gözlü orta boylu Rusiyyetü’l-asl Müslimetü’l-milleti hâfızatü’l-kitâb Âişe bt. Abdullah meclis-i ma‘kūd-ı mezbûrda müteveffâ-yı mezbûrun evlâd-ı sıgārı Mustafa ve Mehmed ve Hadîce ve Emine’nin tesviye-i emrlerine vasiyy-i muhtârları olmağla terekesine vaz‘-ı yed eden el-Hâc Ahmed b. Mehmed mahzarında üzerine da‘vâ ve takrîr-i kelâm edip seyyidim müteveffâ-yı mezbûr el-Hâc Mehmed b. el-Hâc Hamuda hâl-i kemâl-i sıhhatinde fevtinden bir sene mukaddem mülkünde olduğum hâlde hasbeten lillâhi te‘âlâ beni malından tahrîr ve i‘tâk ve harâir-i asliyât silkine idrâc ve ilhâk etmekle ben hürre olmuş iken vasiyy-i mezbûr rık olup terekeden olmak üzere bana bi-gayr-ı hakkın vaz‘-ı yed eder suâl olunsun dedikde gıbbe’s-suâl vasiyy-i mezbûr cevâbında mevsûfe-i mezbûreye vech-i muharrer üzere vaz‘-ı yedini ikrâr lâkin vech-i meşrûh üzere müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden umdetü’l-a‘yân Mustafa Ağa b. Mehmed ve müteveffâ-yı mezbûrun babası mezbûr el-Hâc Hamuda b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. el-Hâc Hamuda hâl-i kemâl-i sıhhatinde fevtinden bir sene mukaddem işbu müdde‘iye-i mezbûre Âişe’yi mülkünde olduğu hâlde hasbeten lillâhi te‘âlâ huzûrumuzda malından tahrîr ve i‘tâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli ilâ-âhirihî. Fi’l-yevmi’s-sâbi‘ aşer min-Rebî‘ülevvel sene 1110 [Şuhûdü’l-hâl]: Eş-şâhidûnü’s-sâbikūn.