Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 404 Hüküm no: 291 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin vefat eden Saraç Mehmed Çelebi’nin varisi olduğunu ispat ettiği Mahmiye-i İstanbul’da Laleliçeşme kurbünde Mesihpaşa-i atîk mahallesi ahâlîsinden olup mahrûse-i Edirne’de bundan akdem müsâfiren vefât eden Saraç Mehmed Çelebi b. Receb b. Sarı Kerki’nin vech-i âtî üzere vârisi olduğunu iddi‘â eden mahmiye-i mezbûrda İbrahimpaşa mahallesinde sâkin bâ‘isü’l-kitâb Ali Beşe b. Arslan b. Nikola mahfil-i kazâda müteveffâ-yı mezbûrun vâlidesi ve terekesine bi’l-verâse vaz‘-ı yed edip zâtı mahmiye-i mezbûrede Emin Nureddin mahallesinde sâkin es-Seyyid Ahmed Çelebi b. es-Seyyid Halil ve Ekşikaradut mahallesinde sâkin Mustafa Çelebi b. ( ) ta‘rîfleriyle mu‘arrefe olan Hadîce Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çelebi’nin babası mezbûr Receb ile benim babam mezbûr Arslan’ın babası mezbûr Nikola li-ebeveyn karındaşlar olup anaları ismi Hatun Şah babaları ismi mezbûr Sarı Kerki ve dedeleri ismi Simyon ve maskat-ı re’sleri Vilâyet-i Anadolu’da Kayseriye kazâsına tâbi‘ Gergeme nâm karyedir müteveffâ-yı mezbûrun verâseti vâlidesi mezbûr[e] ile usûbet-i nesebiye cihetinden bana münhasıra olup cihet-i mezbûreden benden gayrı vâris ve âhar müstahıkkı yoğiken mezbûre Hadîce Hatun mecmû‘-ı terekesine bi-gayr-ı hakkın vaz‘-ı yed edip hissemi bana teslîmden imtinâ‘ eder suâl olunsun dedikde gıbbe’s-suâl mezbûr[e] Hadîce cevâbında mecmû‘-ı terekeye vech-i muharrer üzere vaz‘-ı yedini ikrâr ve müdde‘î-i mezbûrun ber-vech-i meşrûh müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden an-asl medîne-i Kayseriye kazâsı muzâfâtından Bürüngüz nâm karye ahâlîsinden olup mahmiye-i mezbûrede Çakır Ağa mahallesinde sâkin Süleyman Çelebi b. Mustafa ve kezâlik an-asl zikr olunan Gergeme karyesi ahâlîsinden olup mahmiye-i mezbûrede Ekşikaradut mahallesinde sâkin Bektaş Bey b. Ramazan li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mehmed Çelebi’nin babası mezbûr Receb ile müdde‘î-i mezbûr Ali Beşe’nin babası mezbûr Arslan’ın babası mezbûr Nikola li-ebeveyn karındaşlar olup anaları ismi mezbûre Hatun Şah ve babaları ismi mezbûr Sarı Kerki ve dedeleri ismi mezbûr Simyon ve maskat-ı re’sleri karye-i mezbûreden müteveffâ-yı mezbûrun terekesine usûbet-i nesebiye cihetinden müdde‘î-i mezbûrdan gayrı vâris ve âhar müstahık olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde şâhidân-ı mezbûrânı tezkiye içün cânib-i şer‘den Mevlânâ Abdurrahman Efendi b. el-merhûm Ahmed Efendi irsâl olunup ol dahi evvelâ sâlifü’z-zikr Çakır Ağa mahallesine varıp ahâlîsinden Müezzin Hasan Efendi b. Mustafa ve Musa Efendi b. Hasan ve Ali Efendi b. Abdüllatif ve Salih Çelebi b. Abdullah ve Ahmed Beşe b. Hüseyin ve Mehmed Emin Çelebi b. Ali Efendi ve Sadık Çelebi b. Ali ve Mehmed Efendi b. Bayram’dan tefahhus ettikde şâhid-i mezbûr Süleyman Çelebi içün adl ve makbûlü’ş-şehâdedir deyü haber verdiklerini ve sâniyen zikr olunan Ekşikaradut mahallesine varıp ahâlîsinden es-Seyyid Ahmed Çelebi b. Halil ve Ebubekir Bey b. Ali ve Süleyman Çelebi b. Abdullah ve Hasan Efendi b. Yusuf ve İsmail Çelebi b. Mahmud ve Abdullah Çelebi b. Sunullah ve İbrahim Efendi b. Veli ve Yusuf Çelebi b. Abdullah’dan tefahhus eyledikde şâhid-i mezbûr Bektaş içün adl ve makbûlü’ş-şehâdedir deyü haber verdiklerini mevlânâ-yı mezbûr mahallinde tahrîr ba‘dehû ma‘an irsâl olunan Çukadâr el-Hâc Süleyman b. Mehmed ve Mehmed Beşe b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Rebî‘ülevvel sene 1110 Şuhûdü’l-hâl: Mukayyid Mustafa Efendi b. Mehmed, es-Seyyid Abdülmuti Efendi, Uşşâkī Mehmed Efendi, Bektaş b. Ali Efendi, Rûşenî Mehmed Efendi, Ahmed Çelebi b. Süleyman ve gayruhum.