Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 406 Hüküm no: 292 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Leh asıllı köle Yusuf’un hür olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın cânib-i şer‘-i enverden me’zûnen Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Bezzâzistân-ı atîk kurbünde Hüseyin Ağa Câmi‘-i şerîfi’nde beytülmâli’l-hâs emîni sâkin olduğu odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde mahmiye-i mezbûrede Unkapanı kurbünde Elvanzâde mahallesi ahâlîsinden olup mahrûse-i Edirne kurbünde Kozluca nâm karyede müsâfiren vefât eden el-Hâc Ali b. Abdullah b. Abdullah’ın zâhirde zevce-i menkûha-i metrûkeleri işbu Ümmühani bt. Abdullah ve mahrûse-i merkūmede sâkine Fâtıma bt. İsmail’den gayrı vâris-i ma‘rûfu olmamağla terekesinin rub‘u mezbûrelere ve selâse-i erbâ‘ı cânib-i beytülmâle âid oldukdan sonra müteveffâ-yı mezbûra rıkk-ı sâbıkını mu‘terif olan işbu orta boylu açık kaşlı elâ gözlü Lehiyyü’l-asl hâfızü’l-kitâb Yusuf b. Abdullah meclis-i ma‘kūd-ı mezkûrda mahmiye-i mezbûrede bi’l-fi‘il beytülmâli’l-hâs emîni fahrü’l-a‘yân Mustafa Ağa b. Abdurrahman b. Abdülmennan tarafından husûs-ı âti’l-beyânda müseccel vekîli olmağla tereke-i müteveffâ-yı mezbûra bi’l-vekâle vaz‘-ı yed ve vech-i âtî üzere husûmet ve redd-i cevâba kıbel-i şer‘den me’zûn olan Mehmed Çelebi b. Mustafa ile mezbûre Ümmühani mahzarlarında üzerlerine da‘vâ ve takrîr-i kelâm edip seyyidim müteveffâ-yı mezbûr el-Hâc Ali b. Abdullah b. Abdullah fevtinden sekiz ay mukaddem huzûr-ı [75a] Müslimînde hasbeten lillâhi’l-meliki’l-Hallâk malından beni tahrîr ve i‘tâk ve silk-i ahrâr-ı asliyyîne idrâc ve ilhâk etmekle ben sâir ahrâr-ı asliyyîn gibi hür olmuş iken rık olup terekeden olmak üzere vekîl-i mezbûr ile mersûme Ümmühani bana bi-gayr-ı hakkın vaz‘-ı yed ederler suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimîn ve mahalle-i merkūme sâkinlerinden Ali Bey b. Muslu ve Kürd İbrahim b. Mustafa nâm kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffâ-yı mezbûr el-Hâc Ali b. Abdullah b. Abdullah fevtinden sekiz ay mukaddem işbu mevsûf-ı mezbûr Yusuf b. Abdullah’ı hasbeten lillâhi’l-meliki’l-Hallâk huzûrumuzda malından tahrîr ve i‘tâk ve silk-i ahrâr-ı asliyyîne idrâc ve ilhâk eyledi elân mevsûf-ı mezbûr sâir ahrâr-ı asliyyîn gibi hür olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve mevsûf-ı mezbûrdan kasr-ı yedlerine vekîli merkūm ile mezbûre Ümmühani’ye tenbîh eylediğini mevlânâ-yı mezbûr mahallinde tahrîr ve ma‘an ba‘s olunan Mehmed b. Hüseyin ve Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-şehri Rebî‘ülevvel sene 1110 Şuhûdü’l-hâl: Salih Efendi b. Mehmed, Ömer Efendi b. Mehmed, Mustafa Çelebi b. Abdullah, Ahmed Ağa b. Mehmed, el-Hâc Ali b. el-Hâc Osman, Mehmed Çelebi b. Mustafa ve gayruhum.