Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 416 Hüküm no: 300 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vefat eden kocası Şirvanîzade Mustafa Efendi’de mehir ve alacağı olduğu iddiasını ispat edemediği Husûs-ı âti’z-zikrin şer‘an istimâ‘ ve fasl ü hasmı bâbında rikâb-ı hümâyûn-ı şevket-makrûndan bu fakīre hitâben emr-i şerîf-i cihân-mutâ‘ sâdır olmağın imtisâlen-leh akd-i meclis-i şer‘-i kavîm oldukda mahmiye-i İstanbul’da Molla Şeref mahallesi sâkinelerinden Hadîce Hatun bt. el-merhûm Tosyalı Mehmed Efendi b. Muharrem tarafından husûs-ı âti’l-beyânda vekîl olduğu zât-ı merkūmeyi ma‘rifet-i şer‘iyye ile ârifân mahalle-i mezbûrede sâkin hâlâ zevcinin birâderi Molla Ahmed b. Ramazan ve birâderzâdesi Süleyman b. İbrahim şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan mahmiye-i merkūmede Mimârayas mahallesinde sâkin el-Hâc Mustafa b. Mehmed meclis-i ma‘kūd-ı mezbûrda mahmiye-i mezbûrede Mollagürânî mahallesi ahâlîsinden olup diyâr-ı Mısriye’de Dimyat kazâsından ma‘zûlen vefât eden Şirvanîzâde Mustafa Efendi b. Ahmed’in li-ebeveyn hâli kızı ve zât-ı rahm cihetinden hasren vârisesi olmağla terekesine vâzı‘u’l-yed olup zâtı hâlâ zevci Berber Salih Çelebi b. Ahmed ve şâhid-i mezbûr Süleyman b. İbrahim ta‘rîfleriyle mu‘arrefe olan diğer Hadîce Hatun bt. Mehmed Efendi mahzarında üzerine bi’l-vekâle da‘vâ ve takrîr-i kelâm edip müteveffâ-yı mezbûr Şirvanîzâde Mustafa Efendi b. Ahmed müvekkilem mezbûre Hadîce Hatun’u târîh-i kitâbdan yirmi iki sene mukaddem altmış bin akçe mehr-i müeccel tesmiyesiyle tezevvüc ve kabûl edip meblağ-ı mezbûrdan yirmi bin akçesini müvekkilem merkūme müteveffâ-yı mezbûra hayâtında hîbe-i tâm ile hîbe etmekle bâkī zimmetinde kırk bin akçe hakkı kalıp ve bir def‘a malından taht-ı nikâhında iken müteveffâ-yı mezbûra bilâ-temessük iki yüz yirmi beş guruş ve kezâlik bir def‘a dahi bin doksan bir senesi Rebî‘ülevveli’nin gurresiyle müverrah imzâ ve hatmini hâvî işbu deyn temessüğü mantûkunca iki yüz otuz guruş ikrâz ve teslîm ol dahi ba‘de’l-iktirâz ve’t-tesellüm müvekkilem mezbûreyi rızâsıyla tatlîk ettikden sonra gerçi on beş seneden ziyâde bilâ-özr-i şer‘î sükût olunan da‘vânın bilâ-emr-i şerîf istimâ‘ı memnû‘âtdandır lâkin müvekkilem merkūme diyâr-ı âharda Mehmed Ağa nâm kimesneye tezevvüc ve sinîn-i mezbûrede zevci ile ma‘an sâkine olmağla şer‘an ma‘zûre [77a] olmuşdur dedikde savb-ı şer‘den sıdk-ı makāline beyyine taleb olundukda udûl-ı Müslimînden mahmiye-i merkūmede Sinan Ağa mahallesi sükkânından Ahmed Efendi b. Mehmed ve Bâb-ı İsa kurbünde sâkin Mehmed b. Mustafa nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müvekkile-i merkūme Hadîce Hatun bt. el-merhûm Tosyalı Mehmed Efendi vech-i mahkî üzere diyâr-ı âharda Mehmed Ağa nâm kimesneye tezevvüc ve sinîn-i mezbûrede zevci ile ma‘an sâkine olmağla şer‘an ma‘zûre olmuşdur biz bu husûsa ber-minvâl-i muharrer şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de ri‘âyeti şerâiti’l-kabûl şehâdetleri makbûle olup müvekkile-i mezbûre Hadîce’nin özr-i şer‘î ile ma‘zûre idiği lede’ş-şer‘i’l-münevver zâhir ve mukarrer olmağın vekîl-i mezbûrun şer‘an da‘vâsı istimâ‘ olundukda vech-i mübeyyin üzere müvekkilem merkūm min-haysü’l-mecmû‘ müteveffâ-yı mezbûr zimmetinde yedi yüz doksan üç guruş ve bir sülüs guruş hakkını tereke-i müteveffâ-yı mezbûrdan bi’l-vekâle taleb ederim suâl olunsun dedikde gıbbe’s-suâl merkūme diğer Hadîce Hatun cevâbında bin doksan bir senesi Şa‘bâni’l-mükerremi’nin on altıncı günüyle müverraha ve târîh-i mezkûrda Davudpaşa nâibi olup Mekke-i mükerreme kādısı oldukdan sonra intikāl-i dâr-ı bekā eden merhûm Ali Efendi’nin imzâ ve hatmiyle mümzât ve muhtûme işbu hüccet-i şer‘iyye nâtıka olduğu üzere müvekkile-i merkūme Hadîce mûrisim müteveffâ-yı mezbûr Şirvanîzâde Mustafa Efendi ile bi’t-terâzi muhâla‘a olduklarında beynlerinde ma‘lûm üç sehmden ...? mâ‘adâ meblağayn-ı mezbûreyn kırk bin akçe mehr-i müeccel ve iki yüz yirmi beş guruşdan ve bi’l-cümle târîh-i hüccet-i merkūmeye gelince beynlerinde cereyân eden ahz ü i‘tâ ve mu‘âmelât-ı şettâya müte‘allıka âmme-i de‘âvî [ve] mutâlebât ve eymân [ve] muhâsamâtdan her biri âharın zimmetini ibrâ-i âm ile ibrâ ve iskāt etmişdir deyü def‘le mukābele <> ve hüccet-i merkūme merkūm muvâcehesinde feth ü kırâet ve istintâk olunsun dedikde isre’l-istintâk vekîl-i merkūm mazmûn-ı hüccet-i mezbûrenin mecmû‘unu bi’l-vekâle i‘tirâf ve tasdîk etmeğin meblağ-ı mezbûr iki yüz otuz guruş derûn-ı hüccet-i merkūmede mastûr değildir deyü tekrâr da‘vâ sadedinde olmağla temessük-i mezbûrun târîhi bâlâda mufassal olduğu üzere târîh-i hüccet-i merkūmeden beş buçuk ay mukaddem olup meblağ-ı mezbûr iki yüz otuz guruşu kezâlik ibrâ-i âmmın tahtında dâhil olmağla vech-i mübeyyen üzere ba‘de’l-ibrâi’l-âm da‘vâsı mesmû‘a olmamağın mûcebiyle vekîl-i mezbûr merkūme diğer Hadîce Hatun ile bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ min-şehri Rebî‘ülevvel sene 1110 Şuhûdü’l-hâl: Umdetü’l-müderrisîn Yusuf Efendi b. Mehmed <> Bey, Nurullah Efendi b. Abdurrahman, Süleyman Ağa b. Mustafa, İbrahim Çavuş b. Süleyman, Bezzâzistânî İbrahim b. Süleyman, Mehmed Ağa b. Ahmed, Mehmed Çavuş b. Ali, Ahmed Efendi b. Zülfikâr, Hasan b. Hüseyin, Abdurrahim b. Mehmed, Ahmed b. Mehmed.