Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 418 Hüküm no: 301 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Efendi’nin Esirci Mehmed Beşe Para Vakfı’na olan borcunun rehin bıraktığı eşyaların satılarak bedelinden tahsil edilmesi Mahmiye-i İstanbul’da Cafer Subaşı mahallesinde sâkin merhûm Esirci Mehmed Beşe nâm sâhibü’l-hayrın nukūd-ı mevkūfesine bi’l-fi‘il mütevellî olan bâ‘isü’l-kitâb Ali Çelebi b. Ahmed meclis-i şer‘de mahalle-i mezbûr ahâlîsinden olup düyûnu terekesinden ezyed olduğu hâlde vefât eden Mustafa Efendi b. Ali b. Mustafa’nın kebîr oğlu İbrahim Çelebi mahzarında üzerine da‘vâ ve takrîr-i kelâm edip bin yüz dokuz senesi târîhiyle müverrah ve müteveffâ-yı mezbûrun imzâ ve hatmi ile mümzâ ve mahtûm işbu yedimde olan deyn temessüğü nâtık olduğu üzere müteveffâ-yı mezbûr Mustafa Efendi b. Ali b. Mustafa’ya asıl mal-ı vakf-ı mezbûrdan yüz elli guruş idâne ve teslîm ve semen bir sene tamâmına değin müeccel ve mev‘ûd yedimden müşterâ ve makbûz çuka semeninden dahi yirmi iki buçuk guruş min-haysü’l-mecmû‘ yüz yetmiş iki buçuk guruş deyni mukābelesinde deyn temessüğü unvânıyla tahrîr olunan üç sîm reşme ve bir samur kürk ve iki sîm kemer-i raht ve bir sîm gülâbdân ve buhûrdân ve bir sîm topuzunu müteveffâ-yı mezbûr hayâtında bana rehin vaz‘ ve teslîm ben dahi irtihân ve kabz ve tesellüm edip ba‘de’l-made’l-ecel meblağ-ı merkūmu kable’l-edâ ve’l-fek fevt olmağla rihân-ı mezbûresini bey‘ ve esmânından deyn-i merkūmu edâya mezbûr İbrahim Çelebi’ye tenbîh olunmak matlûbumdur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden mahalle-i mezbûre ahâlîsinden es-Seyyid Mustafa Çelebi b. es-Seyyid Mehmed ve İbrahim Beşe b. Ali li-ecli’ş-şehâde meclis-i şer‘ a hâzırân olup istişhâd olunduklarında fi’l-hakīka müteveffâ-yı mezbûr Mustafa Efendi b. Ali b. Mustafa hayâtında işbu müdde‘î-i mezbûr yedinden asıl mal-ı vakfdan yüz elli guruş istidâne ve kabz mebî‘-i mezbûr semeninden dahi yirmi iki buçuk guruş ki min-haysü’l-mecmû‘ yüz yetmiş iki buçuk guruş deyni mukābele müdde‘î-i mezbûr yedine verdiği deyn-i mezbûru nâtık temessük unvânıyla <> tahrîr olunan eşyâ-i mezkûreyi müteveffâ-yı mezbûr huzûrumuzda mütevellî-i mezbûr yedine rehin vaz‘ u teslîm ol dahi irtihân ve kabz u kabûl ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikden sonra ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Hurrire fî 24 min-Rebî‘ülevvel sene 1110 Şuhûdü’l-hâl: Umdetü’l-mevâlî Yahya Efendi b. ( ), Ahmed Çelebi b. Süleyman, Mustafa Bey b. Abdullah, Hüseyin Çelebi b. Mehmed, Abdurrahman Efendi b. Ahmed Efendi.