Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 420 Hüküm no: 303 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mustafa Bey’in varislerinin vefat eden Ayşe Hatun’un terekesindeki hisselerini teslim aldıkları Vilâyet-i Kastamonu’da Hisarardı mahallesi ahâlîsinden olup bundan akdem medîne-i Belgrad’da fevt olduğu şer‘an sâbit ve hükmolunan Mustafa Bey b. İsmail’in verâseti zevce-i menkûha-i metrûkesi olup zikr olunan Hisarardı mahallesinde sâkine Saliha bt. Derviş b. Abdülkerim ile kebîre kızı Âişe ve kebîr oğlu İbrahim’e münhasıra oldukdan sonra mezbûretân Saliha ve Âişe taraflarından husûs-ı âti’l-beyânda iddi‘â-i vekâlet eden mezbûr İbrahim mahfil-i şer‘de müteveffâ-yı mezbûr Mustafa Bey’in mûrisesi olup mahmiye-i İstanbul’da Cibalikapısı dâhilinde Seferikoz mahallesinde sâkine iken bundan akdem vefât eden Âişe Hatun bt. Hâbil <> Dede’den isâbet eden ber-mûceb-i defter iki yüz kırk guruş hissesini ahz u kabz ve hıfza kıbel-i şer‘den vasî ve kayyım nasb olunan Hasan Beşe b. Receb mahzarında üzerine da‘vâ ve takrîr-i kelâm edip babam müteveffâ-yı mezbûr Mustafa Bey’e li-ebeveyn ammi kızı olup vefât eden mezbûre Âişe bt. Hâbil Dede’den ber-mûceb-i defter isâbet eden iki yüz kırk guruş hissesini babam gāib olmağla ahz u kabz ve hıfza mezbûr Hasan Beşe vasî ve kayyım nasb olunmağla zabt edip meblağ-ı merkūmdan bana isâbet eden yüz kırk guruşu ben mukaddemâ kabz ve istîfâ etmiş idim el-hâletü hâzihi meblağ-ı merkūmdan vâlideme isâbet eden otuz guruş ve hemşîreme isâbet eden yetmiş guruş min-haysü’l-mecmû‘ yüz guruşu mezbûr Hasan Beşe’den ahz u kabza ve kendilere îsâle taraflarından beni vekîl etmeleriyle meblağ-ı merkūm yüz guruşu taleb eylediğimde teslîmden imtinâ‘ eder suâl olunsun dedikde gıbbe’s-suâl vasiyy-i mezbûr Hasan Beşe cevâbında fi’l-vâki‘ mezbûretân Saliha ve Âişe’nin yüz guruş hisse-i irsiyelerine vaz‘-ı yedini ikrâr ve taraflarından müdde‘î-i mezbûrun ber-vech-i muharrer vekâletini inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden zikr olunan Hisarardı mahallesi ahâlîsinden mahmiye-i mezbûrede <> Manisalı Çelebi mahallesinde sâkin Mustafa Efendi b. el-Hâc Hasan ve Mehmed Çelebi b. Hüseyin li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûre Saliha bt. Derviş b. Abdülkerim ve mezbûre Âişe bt. Mustafa b. İsmail müteveffâ-yı mezbûr Mustafa Bey’den kendilere isâbet eden hisse-i irsiyelerini vaz‘-ı yed eden işbu mezbûr Hasan Beşe’den taleb ve da‘vâ ve ahz u kabza ve kendilere îsâle taraflarından işbu müdde‘î-i mezbûr İbrahim’i huzûrumuzda vekîl ve nâib-i menâb nasb ü ta‘yîn ettiklerinde ol dahi kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm meblağ-ı merkūmu vekîl-i mezbûra edâya vasiyy-i mezbûra tenbîh olundukdan sonra vekîl-i mezbûr meclis-i mezbûrda vasiyy-i mezbûr mahzarında bi’l-vekâle ikrâr ve takrîr-i kelâm edip ânifen edâsına tenbîh olunan meblağ-ı merkūm yüz guruşu vasiyy-i mezbûr yedinden tamâmen ahz u kabz eyledim min-ba‘d zimmetinde ve yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb kayd-şüd. Hurrire fî 26 min-şehri Rebî‘i’l-evvel li-seneti aşer ve mi’e ve elf. Şuhûdü’l-hâl: es-Seyyid Abdülmuti Efendi, es-Seyyid Mustafa Efendi b. Mehmed, Hasan Çelebi b. Mehmed, Velizâde Mustafa Efendi ve gayruhum mine’l-huzzâr.