Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 419 Hüküm no: 302 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Ağa’nın müteveffa Mimar Mehmed Halife’de olan alacağının sulh yoluyla tahsili Dergâh-ı âlî kapıcıbaşılarından olup bundan akdem medyûnen vefât eden merhûm Ser-kâtib Ahmed Ağa b. Mustafa Efendi b. Bekir’in terekesini kabz ve düyûn-ı müsbetesini edâya cümle dâyinleri ma‘rifetiyle bâ-hüccet-i şer‘iyye vasî ve kayyım nasb ü ta‘yîn olunan Mustafa Ağa b. Haydar Paşa meclis-i şer‘de mahmiye-i İstanbul’da Kâtibkasım mahallesinde sâkin iken bundan esbak vefât eden Mimâr-ı hâssa Mehmed Halîfe b. Abdullah’ın verâseti zevce-i metrûkesi Âişe Hatun’la sulbî kebîr oğlu İbrahim Beşe ve kebîre kızları diğer Âişe ve Râbia nâm hatunlara münhasıra oldukdan sonra merkūmûn İbrahim Beşe ve diğer Âişe ve Râbia taraflarından husûs-ı âti’l-beyânda vekîl olduğu mezbûretânın vârislerini ma‘rifet-i şer‘iyye ile ârifân İbrahim Efendi b. Mehmed ve Mehmed Çelebi b. Abdülfettah şehâdetleriyle şer‘an sâbit olan mezbûre diğer Âişe’nin zevci İbrahim Çelebi b. Abdullah mahzarında bi’l-vesâye ikrâr-ı tâm ve takrîr-i kelâm edip müteveffâ-yı evvel mûmâ-ileyh Ahmed Ağa’nın müteveffâ-yı sânî mezbûr Mehmed Halîfe zimmetinde işbu deyn temessükü mûcebince cihet-i karzdan iki yüz yirmi guruş hakkı olmağla meblağ-ı mezbûrun yüz otuz beş guruşunu hayâtında mezbûr Mehmed Halîfe’ye beynlerinde ma‘lûm ücret tarîkıyle istîfâ ve temessük zahrına tahrîr etmekle yüz kırk beş guruşu bâkī kalıp kable’l-edâ mezbûr Mehmed Halîfe ve ba‘dehû Ahmed Ağa dahi fevt olmuşlar idi el-hâletü hâzihi ben vesâyetim hasebiyle meblağ-ı bâkī-i merkūmun seb‘a-i ismânını terekesine vaz‘-ı yed eden merkūmûn İbrahim Beşe ve diğer Âişe ve Râbia’nın vekîlleri mezbûr İbrahim Çelebi’den taleb ve da‘vâ eylediğimde ol dahi bi’l-külliye inkâr ve benim beyyinem [77b] olmayıp ve müvekkillerimin yemîn etmeleri mukarrer olmağla sulh her vechile merhûm-ı merkūm Ahmed Ağa’nın dâyinleri hakkında nef‘-i mahz olmağla cümle dâyinlerin izin ve rızâlarıyla bi-şarti’d-damân vekîli mezbûr ile ancak seb‘a-i ismânı da‘vâsından mukābelesinde altmış guruş üzerine sulh olduğumda ol dahi sulh-ı mezbûru kabûl ve bedel-i sulh olan meblağ-ı mezbûr altmış guruşu tereke-i müteveffâ-yı mezbûr Mehmed Halîfe ve vekîl-i merkūm yedinden ahz u kabz edip ve mâ‘adâdan ancak müvekkilûn-ı mezbûrûnun zimmetlerini ibrâ ve iskāt eyledim dedikde gıbbe’t-tasdîk mâ-vaka‘a bi’t-taleb kayd-şüd. Hurrire fî-evâsıtı şehri Rebî‘ülevvel sene 1110 Şuhûdü’l-hâl: Abdullah Ağa b. Haydar Paşa, Şatır İbrahim Bey, Hammâmîzâde Ebubekir Beşe el-Mubassır, Yusuf Beşe b. Veli, Ahmed Ağa Kethüdâ.