Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 422 Hüküm no: 305 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraçhane Kethüdası Hüseyin Ağa’da olan alacağın ödenmesi için mühlet verildiği Saraç tâifesinden olup mahmiye-i İstanbul’da Laleliçeşme mahallesinde sâkin iken bundan akdem vefât eden Solak Mehmed Çelebi b. Receb b. Abdullah’ın vâlidesi ve hasren vârisesi olup zâtı es-Seyyid Ahmed Çelebi b. es-Seyyid Halil ve İsmail Beşe b. Mehmed ta‘rîfleriyle mu‘arrefe olan işbu bâ‘isetü’l-kitâb Hadîce Hatun bt. Abdullah meclis-i şer‘de sâbıkā Saraçhane kethüdâsı olan Gedikpaşa mahallesinde sâkin Hüseyin Ağa [b.] Halil mahzarında üzerine da‘vâ ve takrîr-i kelâm edip oğlum ve hasren mûrisim müteveffâ-yı mezbûr Solak Mehmed Çelebi’nin hayâtında yedinden müşterâ ve makbûz beynlerinde ilm-i şer‘î ile ma‘lûm sarrâc metâ‘ı bahâsından ba‘de küllî hesâb mezbûr Hüseyin Ağa zimmetinde bin yüz kırk altı guruş hakkı olup kable’l-istîfâ oğlum mezbûr Mehmed Çelebi fevt olmağla meblağ-ı mezbûr irsen bana isâbet ve intikāl ettikden sonra medyûn-ı mezbûr Hüseyin Ağa meblağ-ı mezbûrun ancak altı guruşunu bana edâ ve teslîm ben dahi ahz u kabz edip mütebâkī bin yüz kırk guruş zimmetinde bâkī kalmağla hâlâ taleb ederim suâl olunsun dedikde gıbbe’s-suâl mezbûr Hüseyin Ağa cevâbında kaziyye vech-i meşrûh [üzere] olup cihet-i merkūmeden meblağ-ı bâkī bin yüz kırk guruşu verâsetim hasebiyle müdde‘iye-i mezbûreye vâcibü’l-edâ ve lâzımü’l-kazâ zimmetimde deynimdir deyü ikrâr u i‘tirâf etmeğin mûcebince meblağ-ı mezbûr sekiz yüz kırk guruşu müdde‘iye-i mezbûreye edâ ve teslîme mezbûr Hüseyin Ağa’ya tenbîh olundukdan sonra mezbûr Hüseyin Ağa’nın âcilen edâya iktidârı olmamağla müdde‘iye-i mezbûre rızâsıyla medyûn-ı mezbûr Hüseyin Ağa’yı târîh-i kitâbdan doksan bir gün tamâmına değin tecîl ve imhâl eyledikde ol dahi kabûl etmeğin ba‘dehû medyûn-ı mezbûrun emriyle mahmiye-i mezbûrede Molla Hüsrev mahallesinde sâkin Koğacı el-Hâc Ahmed b. Mustafa ve Saraçhane ahâlîsinden Kabûlî Mehmed Ağa b. Ebubekir ve el-Hâc Mehmed b. Halil nâm kimesneler medyûn-ı mezbûr Hüseyin Ağa’nın vech-i muharrer üzere deyni olan meblağ-ı mahkûm-ı mezbûr bin yüz kırk guruşa kefâlet-i sahîha-i şer‘iyye ile mala? kefîl ve dâmin olduklarında mezbûre Hadîce Hatun dahi kefâletlerini kabûl etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Rebî‘i’l-evvel li-seneti aşer ve mi’e ve elf. Şuhûdü’l-hâl: es-Seyyid Ahmed Çelebi b. Seyyid Halil, el-Hâc Mustafa b. Hacı Mehmed, İsmail Çelebi b. Mehmed, Nasuh Beşe b. ( ) Çukadâr, Kenan(?) Bey b. Abdullah.