Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 423 Hüküm no: 306 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Şahbaz Hatun’un varislerinin terekeden intikal eden evi Satı Beşe’ye sattıkları Husûs-ı âti’l-beyânın mahallinde ketb ü tahrîri içün savb-ı şer‘den Mehmed Efendi b. Mahmud irsâl olunup ol dahi mahmiye-i İstanbul’da Mevlevîhâne Yenikapısı [kurbünde] Melek Hatun mahallesinde Hüseyin Çelebi b. Salih’in menziline varıp akd-i meclis ettikde mahalle-i mezbûrede sâkine iken bundan akdem vefât eden Şahbaz Hatun bt. Abdullah’ın verâseti zevc-i metrûku İbrahim Efendi ile kız karındaşı Gülbuy bt. Abdullah’a münhasıra oldukdan sonra mezbûr İbrahim Efendi asâleten ve mezbûre Gülbuy bt. Abdullah’ın zâtı Mehmed Efendi b. Mustafa ve Mustafa Çelebi b. Mehmed ta‘rîfleriyle mu‘arrefe oldukdan sonra asâleten ve müteveffât-ı mezbûrenin terekesinin sülüsünü vücûh-ı birr-i mu‘ayyeneye sarfa vasiyy-i muhtârı mezbûr Hüseyin Çelebi vesâyeten meclis-i ma‘kūd-ı mezbûrda işbu hâfızü’l-kitâb Satı Beşe b. Halil mahzarında her biri ikrâr ve takrîr-i kelâm edip müteveffât-ı mezbûrenin ile’l-vefât yedinde mülk ve hakkı olduğu müsbet olan mahalle-i mezbûrede vâki‘ bir tarafdan Ömer Çelebi mülkü ve bir tarafdan Nalband Hasan menzili ve bir tarafdan ba‘zan mezbûr Mustafa Çelebi menzili ve ba‘zan İbrahim Çelebi menzili ve bir tarafdan tarîk-i âmma müntehî dâhiliyede fevkānî bir bâb oda ve bir sofa ve bir mikdâr dehliz ve hâriciyede bir bâb tahtânî oda ve bir ahır ve bir matbah ve bir su kuyusu ve bahçe ve kenîf ve sundurma ve samanlık ve havluyu müştemil mülk menzil münâdîlerden Hüseyin Çelebi nâm münâdî yediyle nidâ ve müzâyede olunup rağabât-ı nâs bi’l-külliye munkatı‘a oldukdan sonra merkūm Satı Beşe üzerinde yüz on guruşda karâr edip ziyâde ile tâlib-i âhar zuhûr etmeyip ve meblağ-ı mezbûr yevm-i akdde semeni olmağla menzil-i mahdûd-ı mezkûru cemî‘ tevâbi‘ ve levâhıkıyla ve kâffe-i hukūk [ve] merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Satı Beşe’ye yüz on guruşa bey‘ u teslîm ol dahi iştirâ ve tesellüm ve temellük edip semen-i misli olan meblağ-ı mezbûr yüz on guruşu mezbûr Satı Beşe yedinden bi-kadri’l-hısâs tamâmen ahz u kabz eyledik ba‘de’l-yevm menzil-i mahdûd-ı mezkûr mezbûr Satı Beşe’nin mülk-i müşterâsıdır keyfe mâ yeşâ mutasarrıf olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr tahrîr ba‘dehû ma‘an irsâl olunan Mehmed b. Hüseyin ile meclis-i şer‘a gelip takrîr etmeğin mâ-vaka‘a kayd-şüd. Fî 27 Rebî‘ülevel <> li-seneti 1110 Şuhûdü’l-hâl: Mehmed Çelebi b. İbrahim, el-Hâc [Ra]mazan b. Abdullah, Mustafa Halîfe b. Rıdvan, el-Hâc Sinan b. Ahmed, el-Hâc Ali Çelebi b. Hamza, Ömer Çelebi b. Ahmed.