Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 434 Hüküm no: 315 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin varislerinden Ayşe ve Mehmed’in ev hisselerini diğer varis Saliha Hatun’a sattıkları Kezâlik akd-i meclis-i şer‘-i kavîm ettikde müteveffâ-yı mezbûrun verâseti zevce-i menkûha-i metrûkesi Saliha Hatun bt. Mustafa ile li-ebeveyn kız karındaşı Âişe’ye ve li-ebeveyn er karındaşı olup kasaba-i Kastamonu’da sâkin Mehmed’e münhasıra ve tashîh meselesi dört sehmden olmağla sihâm-ı mezbûrenin bir sehmi zevcesi mezbûreye ve bir sehmi kız karındaşı mezbûreye ve iki sehmi er karındaşı mezbûr Mehmed’e isâbeti tahakkukundan sonra zâtı ma‘rifet-i şer‘iyye ile ârifân Ahmed Çelebi b. Ali ve İbrahim Beşe b. Abdullah ta‘rîfleriyle mu‘arrefe olan mezbûre Âişe asâleten ve mezbûr Mehmed tarafından husûs-ı âti’l-beyânda müseccel vekîli Hüseyin Dede b. Mahmud vekâleten meclis-i ma‘kūd-ı mezbûrda işbu bâ‘isetü’l-vesîka mezbûre Saliha mahzarında her biri ikrâr ve takrîr-i kelâm edip müteveffâ-yı mezbûrun terekesinden olup işbu mahalle-i mezbûrede vâki‘ bir tarafdan el-Hâc Hüseyin Vakfı olan odalar ve bir tarafdan Rahime bt. Abdullah nâm hatun menzili ve bir tarafdan tarîk-i hâs ve bir tarafdan tarîk-i âm ile mahdûd fevkānî bir bâb oda ve bir sofa ve tahtânî bir bâb oda ve bir sofa ve bi’r-i mâ ve kenîfi ve havluyu müştemil mülk menzil hâssa münâdîlerden Hasan nâm münâdî yediyle sûk-ı sultânîde on beş gün mikdârı nidâ ve müzâyede olunup rağabât-ı nâs münkatı‘a oldukdan sonra yüz otuz bir guruşda mezbûre Saliha üzerinde karâr edip ziyâde ile tâlib-i [80a] âhar olmadığından mâ‘adâ meblağ-ı merkūm menzil-i mezbûrun yevm-i akdde semen-i misli idiği bî-garaz Müslimîn haberleriyle mütehakkık olmağın biz dahi menzil-i mezbûrdan tashîh-i merkūm üzere bize isâbet eden üç sehm-i şâyi‘imizi cümle tevâbi‘i ile tarafeynden îcâb ve kabûlü hâvî şurût-ı müfsideden ârî bey‘-i kat‘î ile on bir bin yedi yüz sağ akçeye mezbûre Saliha’ya bey‘ u temlîk ve teslîm ol dahi ber-vech-i muharrer iştirâ ve tesellüm ve kabz u kabûl edip semeni olan meblağ-ı merkūmu yedinden tamâmen alıp kabz eyledik ba‘de’l-yevm menzil-i mahdûd-ı mezbûrun üç sehmi mezbûre Saliha’nın mülk-i müşterâsıdır keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli kezâlik mevlânâ-yı [mezbûr] inhâ ve takrîr etmeğin mâ-vaka‘a kayd-şüd. [Fî] 26 Rebî‘ülevvel sene 1110 Şuhûdü’l-hâl: İmâm İbrahim Efendi b. Ali, Abdülkerim Efendi b. Mustafa, İsmail Efendi b. Süleyman, Hüseyin Çelebi b. Mehmed, Derviş Mehmed Çelebi b. Selim, Ahmed Ağa b. İsmail, Bektaş Beşe b. Mustafa.