Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 433 Hüküm no: 314 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un vefat eden kocası Hasan Beşe’de mehir bedeli alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen Mevlânâ Uşşâkī Mehmed Efendi irsâl olunup ol dahi mahmiye-i İstanbul’da Alipaşa-i atîk mahallesinde sâkin iken bundan akdem vefât eden Hasan Beşe b. Mahmud’un menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm ettikde müteveffâ-yı mezbûrun zevce-i menkûha-i metrûkesi olup zâtı mahalle-i mezbûre ahâlîsinden İsmail Efendi b. Süleyman ve Hüseyin Çelebi b. Mehmed ta‘rîfleriyle mu‘arrefe olan bâ‘isetü’l-kitâb Saliha Hatun bt. Mustafa meclis-i ma‘kūd-ı mezbûrda müteveffâ-yı mezbûrun li-ebeveyn karındaşı olup zâtı mu‘arrifân-ı mezbûrân ta‘rîfleriyle mu‘arrefe olan Âişe Hatun mahzarında üzerine da‘vâ ve takrîr-i kelâm edip zevcim müteveffâ-yı mezbûr Hasan Beşe b. Mahmud zimmetinde mütekarrir ve ma‘kūdun-aleyh olan yirmi beş guruş mehr-i müeccelim ve cihet-i karzdan ba‘de-küllî hesâb elli guruş hakkım olup hattâ müteveffâ-yı mezbûr hâl-i kemâl-i sıhhatinde ciheteyn-i mezbûreteynden zimmetinde bana edâsı vâcib ol kadar guruş deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Ma‘cûnî Kasım mahallesinde sâkin Mustafa Beşe b. İsmail ve Mimârsinan mahallesi sükkânından İbrahim Beşe b. Ali ve Abdülkerim Efendi b. Mustafa ve İsmail Çelebi b. Süleyman li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka müteveffâ-yı mezbûr Hasan Beşe b. Mahmud b. …? hâl-i kemâl-i sıhhatinde zevcesi işbu müdde‘iye-i mezbûreye ciheteyn-i merkūmeteynden zimmetinde yetmiş beş guruş edâsı vâcib deyni olduğunu bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İbrahim Çelebi b. Mehmed[le] meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb kayd-şüd. Hurrire fî 26 min-Rebî‘ülevvel sene 1110 Şuhûdü’l-hâl: İmâm İbrahim Efendi b. Ali, Hüseyin Çelebi b. Mehmed, Ahmed Çelebi b. Mehmed, Ali Çelebi b. Abdi, Derviş Mehmed Çelebi [b.] Selim, Ahmed Ağa b. İsmail, Bektaş b. Abdullah.