Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 439 Hüküm no: 319 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vefat eden oğlu İsmail Ağa’dan intikal eden miras hissesini vasiden teslim aldığı Mahmiye-i İstanbul’da Seydi Ağa mahallesinde sâkine iken bundan akdem vefât eden Âişe Hanım bt. Abdurrahman Paşa’nın verâseti Basra’da sükûnu mesmû‘ olan zevc-i metrûku Mehmed Ağa b. Abdurrahman ile sagīre kızı Safiye Hanım’a ve li-ebeveyn kız karındaşı Zeyneb Hanım’a münhasıra olup ba‘de’l-kısme sagīre-i mezbûre dahi vefât edip verâseti babası gāib-i mezbûr Mehmed Ağa’ya münhasıra oldukdan sonra mezbûr Mehmed Ağa’nın mal-ı müntakilini zabt u hıfza bundan akdem kıbel-i şer‘den vasî ve kayyım nasb olunup bi-hasebi’l-vesâye kabz eden İsmail Ağa b. Mustafa’nın makbûzunun hesâbını görmeğe kıbel-i şer‘den dahi vasî nasb olunan mezbûr Mehmed Ağa’nın vâlidesi ve zâtı ma‘rifet-i şer‘iyye ile mu‘arrefe olan bâ‘isetü’l-kitâb Râbia Hatun bt. Hamza Efendi meclis-i şer‘de merkūm İsmail Ağa mahzarında üzerine da‘vâ ve takrîr-i kelâm edip oğlum gāib-i mezbûr Mehmed Ağa b. Abdurrahman’a para dört akçe hesâbı üzere ba‘de-ihrâci’l-mesârif defter-i kassâm-ı askerî mûcebince iki mertebede isâbet edip makbûzu olan bir kere yüz bin ve sekiz bin altı yüz altmış bir akçe hakkını mezbûr İsmail Ağa kabz ve mesârifine sarfla istihlâk edip üzerine redd ü damân lâzım gelen mezbûr İsmail Ağa’dan taleb ederim suâl olunsun dedikde gıbbe’s-suâl mezbûr İsmail Ağa cevâbında kaziyye müdde‘iye-i mezbûrenin takrîr-i meşrûhu üzere olup meblağ-ı merkūm bir kere yüz bin ve sekiz bin altı yüz altmış bir akçe gāib-i mezbûra zimmetimde edâsı lâzım deynim vardır deyü ikrâr u i‘tirâf etmeğin alâ-mûcibi i‘tirâfihî merkūm İsmail Ağa’ya Mehmed’de hıfz olunmak üzere meblağ-ı merkūmu vasiye-i mezbûreye edâya tenbîh birle mâ-vaka‘a bi’t-taleb kayd-şüd. Hurrire fî 22 min-şehri Rebî‘i’l-evvel li-seneti aşer ve mi’e ve elf. Şuhûdü’l-hâl: Mehmed Ağa b. İbrahim, Hâfız Mehmed Efendi [b.] Şeyh Mustafa, Rûşenî Mehmed Efendi b. İbrahim, Hidayetullah Efendi, Uşşâkī Mehmed Efendi.