Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 440 Hüküm no: 320 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vefat eden oğlu Mehmed Ağa’ya ait parayı vasisi İsmail Ağa’dan teslim aldığı Derûn-ı hüccet-i şer‘iyyede mastûrü’l-ism olan Mehmed Ağa b. Abdurrahman’ın Basra’da fevt olduğu şuhûd-ı udûl ile sâbit olup verâseti mezbûre Râbia Hatun bt. Hamza Efendi’ye münhasıra olduğu şer‘an zâhir oldukdan sonra zâtı Mehmed Efendi b. Süleyman ve Mehmed Ağa b. İbrahim ta‘rîfleriyle mu‘arrefe olan mezbûre Râbia Hatun meclis-i şer‘de kezâlik derûn-ı hüccetde mastûrü’l-ism olan vasiyy-i mezbûr İsmail Ağa mahzarında ikrâr ve takrîr-i kelâm edip oğlum müteveffâ-yı mezbûrun işbu hüccet-i şer‘iyye mûcebince vasiyy-i mezbûr zimmetinde para dörder akçe hesâbınca bir kere yüz bin ve sekiz bin altı yüz altmış bir akçe hisse-i müntakilesi bana isâbet etmekle meblağ-ı mezbûrun hesâb-ı mezbûr üzere üç bin yüz yirmi akçesini emrim ile mesârif-i ma‘lûmeye sarf edip bâkī bir kere yüz bin ve beş bin beş yüz kırk bir akçeyi yedinden tamâmen ahz u kabz eyledim meblağ-ı mezbûrdan yedinde ve zimmetinde bir şeyim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurreti Rebî‘i’l-âhir li-seneti aşer ve mi’e ve elf. Şuhûdü’l-hâl: es-Seyyid Abdülmuti Efendi, Mehmed Efendi İskilibli, Hasan Ağa b. Salih, Mehmed Ağa b. İbrahim, Mustafa Efendi b. Cafer, Abdülkerim Efendi b. Ramazan, Mustafa Ağa b. Ahmed.