Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 452 Hüküm no: 326 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in Hanefi Hatun Vakfı’na olan borcunun terekeden ödenmesi Husûs-ı âti’l-beyânın mahallinde istimâ‘ ve tahrîri içün savb-ı şer‘den bi’t-taleb me’zûnen irsâl olunan Ahmed Efendi [b.] el-merhûm Mehmed Efendi mahmiye-i İstanbul’da Samanveren mahallesinde sâkin iken bundan akdem vefât eden el-Hâc Mehmed b. Hamud’un <> menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm eyledikde merhûme Hanefi Hatun nâm sâhibetü’l-hayrın nukūd-ı mevkūfesine bi’l-fi‘il mütevellî olan müteveffâ-yı mezbûrun sulbî kebîr oğlu bâ‘isü’l-kitâb Ali Çelebi meclis-i ma‘kūd-ı mezbûr[da] evlâd-ı sıgārı Mehmed ve Mustafa ve Hadîce ve Emine’nin tesviye-i emrlerine vasiyy-i muhtârları olmağla terekesine vaz‘-ı yed eden el-Hâc Ahmed b. Mehmed mahzarında üzerine da‘vâ ve takrîr-i kelâm edip babam müteveffâ-yı mezbûr el-Hâc Mehmed b. el-Hâc Hamud b. Mehmed vakf-ı mezbûra benden mukaddem mütevellî olmağla asıl mal-ı vakf-ı mezbûrdan zimmetinde üç yüz beş guruş deyni olup hattâ hâl-i marazında fevtinden beş gün mukaddem cânib-i vakf-ı mezbûra ol kadar guruş deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahalle-i mezbûre sükkânından Süleyman Çelebi b. Sinan ve Mahmud Hoca b. Abdullah li-ecli’ş-şehâde meclis-i şer‘a hâzırân [olup] isre’l-istişhâd fi’l-hakīka müteveffâ-yı mezbûr el-Hâc Mehmed b. el-Hâc Hamud b. Mehmed hâl-i marazında fevtinden beş gün mukaddem merhûme Hanefi Hatun Vakfı’na zimmetimde üç yüz beş guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın <> gıbbe’t-tahlîf mûcebiyle ba‘de’l-hükm mâ-vaka‘a bi’t-taleb kayd-şüd. Hurrire fî gurre-i Rebî‘i’l-evvel li-seneti aşer ve mi’e ve elf. Şuhûdü’l-hâl: el-Hâc Süleyman b. Seyfullah, el-Hâc Hamud b. Mehmed, Yusuf b. Abdullah, Osman Çelebi b. Mehmed.