Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 453 Hüküm no: 327 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç Ali Çelebi’nin vefat eden Saraç Mehmed Çelebi’de alacağı olduğunu ispat ettiği Mahmiye-i İstanbul’da Laleliçeşme kurbünde sâkin olup mahrûse-i Edirne’de müsâfiren vefât eden Saraç Mehmed Çelebi b. Receb’in verâseti vâlidesi Hadîce bt. Abdullah’a ve li-ebeveyn ammi oğlunun oğlu Ali Beşe b. Arslan’a münhasıra oldukdan sonra sarrâc tâifesinden olup mahmiye-i mezbûrede Şeyh Ebulvefâ mahallesinde sâkin bâ‘isü’l-kitâb Ali Çelebi b. Hüseyin mahfil-i kazâda tereke-i müteveffâ-yı mezbûra bi’l-verâse vaz‘-ı yed edip zâtı ta‘rîf-i şer‘î ile mu‘arrefe olan mezbûre Hadîce ve mezbûr Ali Beşe mahzarlarında üzerlerine da‘vâ ve takrîr-i kelâm edip müteveffâ-yı mezbûr Saraç Mehmed Çelebi b. Receb b. Abdullah zimmetinde yedimden müşterâ ve makbûz sarrâc metâ‘ı bahâsından ba‘de külli’l-hesâb yetmiş altı guruş hakkım olup hattâ müteveffâ-yı mezbûr hâl-i kemâl-i sıhhatinde cihet-i mezbûrdan bana ol kadar guruş deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden İbrahimpaşa-i atîk mahallesinde sâkin Saraç Ahmed Çelebi b. İbrahim ve İbrahim Çelebi b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Mehmed Çelebi b. Receb b. Abdullah hâl-i kemâl-i sıhhatinde işbu müdde‘î-i mezbûr Ali Çelebi’ye sarrâc metâ‘ı bahâsından ba‘de külli’l-hesâb zimmetimde yetmiş altı guruş vâcibü’l-edâ deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 3 Rebî‘i’l-âhir li-seneti aşer ve mi’ete ve elf. Şuhûdü’l-hâl: Yahya Efendi b. Mustafa, Abdurrahman Efendi b. Ahmed, el-Hâc İsmail b. Mehmed, Mehmed b. Ramazan.